എന്ത്‌കൊണ്ടാണ് മറ്റു കാരണങ്ങള്‍ കൂടാതെ കുട്ടികള്‍ക്ക് അടിക്കടി രോഗങ്ങൾ ഉണ്ടാകുന്നത്?

കുട്ടികളുടെ രോഗപ്രതിരോധശേഷി മുതിര്‍ന്നവരെ അപേക്ഷിച്ച് കുറവാണ്. പെട്ടെന്ന് രോഗം വരാനുളള സാധ്യതകളും കൂടുതലാണ്. എപ്പോഴും വയ്യായ്കയെന്ന്, സ്വന്തം കുട്ടികളെ പററി ആകുലപ്പെടുന്ന മാതാപിതാക്കള്‍ ധാരാളമുണ്ട്. പ്രത്യേകിച്ചും സ്‌കൂളില്‍ പോകുന്ന കുട്ടികളും മറ്റും. ഇപ്പോഴത്തെ കാലത്ത്, പ്രത്യേകിച്ചും കോവിഡ് കാലത്തിന് ശേഷം കുട്ടികള്‍ക്ക് അടിക്കടി രോഗം വരുന്നത് പതിവായിട്ടുമുണ്ട്. പലപ്പോഴും ഡോക്ടര്‍മാരെ മാറി മാറി കാണിച്ചിട്ടു പോലും പ്രതിവിധിയില്ല, കാരണം എന്തെന്ന് കണ്ടെത്താനാകുന്നില്ല എന്നിങ്ങനെ പരാതിയുളളവരും ധാരാളമാണ്. ചിലപ്പോള്‍ പല തരം ടെസ്റ്റുകള്‍ കഴിഞ്ഞിട്ടും കാരണം കണ്ടെത്താതെ വ്യാകുലപ്പെടുന്നവരും ധാരാളമാണ്.

കുട്ടികളുടെ രോഗത്തിന്, പ്രത്യേകിച്ചും അടിക്കടി വരുന്ന രോഗത്തിന് ചിലപ്പോള്‍ ഒരു കാരണമേ ഉണ്ടാകൂ. ഒരു പ്രത്യേക വൈറ്റമിന്റെ കുറവ്. ഇത് മറ്റൊന്നുമല്ല. വൈറ്റമിന്‍ ഡി തന്നെ. സൂര്യപ്രകാശത്തില്‍ നിന്നും ചില പ്രത്യേക ഭക്ഷണങ്ങളില്‍ നിന്നും ലഭിച്ചു വരുന്ന വൈറ്റമിന്‍ ഡിയുടെ കുറവ് ഇന്നത്തെ കാലത്ത് മുതിര്‍ന്നവരെ മാത്രമല്ല, കുട്ടികളേയും അലട്ടുന്ന ഒന്നാണെന്നാണ് ആരോഗ്യ വിദഗ്ധര്‍ അഭിപ്രായപ്പെടുന്നത്. വൈറ്റമിന്‍ ഡി രോഗപ്രതിരോധ ശേഷിയുണ്ടാകാന്‍ ഏറെ അത്യാവശ്യമാണ്. ഇതിന്റെ കുറവ് പരിധിയില്‍ താണു പോകുന്നത് മുതിര്‍ന്നവരില്‍ മാത്രമല്ല കുട്ടികളിലും രോഗങ്ങള്‍ക്കുള്ള സാധ്യത വര്‍ദ്ധിപ്പിയ്ക്കുന്നു.

കോവിഡ് കാലത്തിന് ശേഷം കുട്ടികളെ ബാധിയ്ക്കുന്ന പ്രധാനപ്പെട്ട ഒരു പ്രശ്‌നമാണ് വൈറ്റമിന്‍ ഡി കുറവെന്ന് സയന്‍സ് ചൂണ്ടിക്കാട്ടുന്നു. കോവിഡ് കാലത്ത് വീട്ടിനുള്ളില്‍ തന്നെ അടച്ചിരുന്നതാണ് പ്രധാന കാരണമായി പറയുന്നത്. സാധാരണ കുട്ടികള്‍ സ്‌കൂളില്‍ പോകുമ്പോഴും കളിയ്ക്കാനായി പുറത്തു പോകുമ്പോഴുമെല്ലാം സൂര്യപ്രകാശമേല്‍ക്കുന്നു. ഇതിനാല്‍ തന്നെ ഈ വൈറ്റമിന്റെ കുറവ് കാര്യമായി അനുഭവപ്പെടുന്നില്ല. കോവിഡ് കാലം ഇത്തരത്തിലെ പ്രകൃതിയുമായുള്ള സമ്പര്‍ക്കം കുറച്ചത് തന്നെയാണ് കുട്ടികള്‍ക്കും വിനയായത്.

വൈറ്റമിന്‍ ഡി രോഗപ്രതിരോധശേഷി കുറയ്ക്കുക മാത്രമല്ല, കുട്ടികളുടെ വളര്‍ച്ചയേയും എല്ലിന്റെ ആരോഗ്യത്തേയും സാരമായി ബാധിയ്ക്കുകയും ചെയ്യുന്നു. കാല്‍സ്യം ആവശ്യത്തിന് എത്തിയാലും വൈറ്റമിന്‍ ഡി കുറവെങ്കില്‍ ഇത് ശരീരത്തിന് വേണ്ട രീതിയില്‍ ഉപയോഗപ്പെടുത്താന്‍ സാധിയ്ക്കില്ല. ഇത് കുട്ടികളില്‍ വളര്‍ച്ചയ്ക്ക് തടസമാകുന്നു. എല്ലുകളുടെ ബലം കുറഞ്ഞ് പെട്ടെന്ന് ഒടിവുകളും മറ്റുമുണ്ടാകാന്‍ ഇടയാകുന്നു. മസില്‍ വേദന, അസ്വസ്ഥത എന്നിവയെല്ലാം ഇത് കുട്ടികളില്‍ ഉണ്ടാക്കുന്ന പ്രശ്‌നങ്ങളാണ്. ഡിപ്രഷന്‍, ഏകാഗ്രതക്കുറവ് പോലുള്ള പ്രശ്‌നങ്ങളും കുട്ടികള്‍ക്കുണ്ടാകും.

സൂര്യപ്രകാശം തന്നെയാണ് വൈറ്റമിന്‍ ഡിയുടെ ഉറവിടം. കുട്ടികള്‍ക്ക് പുറത്ത് പോകാനും കളിയ്ക്കാനുമെല്ലാം അവസരങ്ങളുണ്ടാക്കുക. മുട്ട, കൂണ്‍, പാല്‍ ഉല്‍പന്നങ്ങള്‍, മീനുകള്‍, ഇലക്കറികള്‍ എന്നിവയെല്ലാം കുട്ടികള്‍ക്ക് നല്‍കുന്നത് നല്ലതാണ്. കുട്ടികള്‍ക്ക് മറ്റു കാരണങ്ങള്‍ കൂടാതെ അടിക്കടി രോഗം വരുന്നത് പതിവാണെങ്കില്‍ വൈറ്റമിന്‍ ഡി കുറവുണ്ടോയെന്ന് കൂടി കണ്ടെത്തുക. ഇതിന് സപ്ലിമെന്റുകളും ലഭ്യമാണ്. എന്നാല്‍ ഇത് ഡോക്ടറുടെ നിര്‍ദേശ പ്രകാരം മാത്രം നല്‍കുക. കാരണം ഇതിന്റെ അളവ് കൂടുന്നതും കുറയുന്നത് പോലെ തന്നെ ദോഷകരമാണ്.