ആദ്യം കയ്‌ക്കും പിന്നെ മധുരിക്കും നെല്ലിക്കയുടെ ആരോഗ്യഗുണങ്ങൾ

ആദ്യം കയ്‌ക്കും പിന്നെ മധുരിക്കും നെല്ലിക്ക ആരോഗ്യ ഗുണങ്ങൾക്ക് പേര് കേട്ടതാണ്. ചുളിവുകൾ വീഴുന്നത് തടയുന്നത് ഉൾപ്പെടെ ചർമ സൗന്ദര്യത്തിനും നെല്ലിക്ക സഹായിക്കും, കൂടാതെ മുടിയഴകിനു നെല്ലിക്ക പല രീതിയിൽ ഉപയോഗിക്കാറുണ്ട്. നെല്ലിക്ക പോലെ തന്നെ ഗുണകരമാണ് നെല്ലിക്ക ജ്യൂസ് കുടിക്കുന്നതും. വിറ്റാമിൻ സി, ആന്റി ഓക്സിഡന്റ്, ഫൈബർ, മിനറൽസ്, കാൽത്സ്യം തുടങ്ങിയ പോഷകങ്ങളാൽ സമ്പന്നമാണ് നെല്ലിക്ക. രോഗ പ്രതിരോധ ശേഷി മെച്ചപ്പെടുത്താനും അണുബാധ, ബാക്ടീരിയ തുടങ്ങിയവയെ പ്രതിരോധിക്കാനും നെല്ലിക്ക സഹായിക്കും.

നെല്ലിക്ക ജ്യൂസ് കുടിക്കുന്നത് പതിവാക്കുന്നത് വഴി ആരോഗ്യത്തിനും സൗന്ദര്യത്തിനും അനേകം നേട്ടങ്ങളാണ് ലഭിക്കുക. നെല്ലിക്ക ജ്യൂസ് തയ്യാറാക്കുമ്പോൾ അതിലേയ്ക്ക് മറ്റ് ചില ചേരുവകൾ കൂടെ ചേർക്കുന്നത് ഗുണം ഇരട്ടിയാക്കും.

1.നെല്ലിക്ക ജ്യൂസിൽ കറ്റാർ വാഴ നീര് ചേർക്കുന്നത്‌-കറ്റാർ വാഴ നിരവധി ഔഷധ ഗുണങ്ങളുള്ള ഒന്നാണെന്ന് നമുക്കെല്ലാം അറിവുള്ളതാണ്. കറ്റാർ വാഴയുടെ നീരിൽ നെല്ലിക്ക ജ്യൂസ് ചേർത്ത് തയ്യാറാക്കുന്ന പാനീയം പ്രതിരോധശേഷി മെച്ചപ്പെടുത്താൻ സഹായിക്കുന്നു. കൂടാതെ ചർമ്മ-കേശ സൗന്ദര്യത്തിനും ശരീരത്തിൽനിന്ന് വിഷാംശം ഇല്ലാതാക്കുന്നതിനും ഇത് സഹായിക്കും.

2.ചിരങ്ങ ജ്യൂസിൽ നെല്ലിക്ക ജ്യൂസ് ചേർക്കുന്നത്‌-വെള്ളം ധാരാളം അടങ്ങിയ ഒരു പച്ചക്കറി വർഗ്ഗമാണ് ചിരങ്ങ. ശരീരഭാരം കുറയ്ക്കാൻ ഇതിന്റെ ജ്യൂസ് സഹായിക്കും, എന്ന് മാത്രമല്ല, ഈ ജ്യൂസ് കുടിക്കുന്നത് ഹൃദയാരോഗ്യം മെച്ചപ്പെടുത്താനും രക്തസമ്മർദം നിയന്ത്രിക്കാനും പ്രമേഹത്തെ വരുതിയിലാക്കാനുമെല്ലാം സഹായിക്കും. ചിരങ്ങയും നെല്ലിക്കയും ഉപയോഗിച്ച് പ്രതിരോധശേഷി വർധിപ്പിക്കുന്ന പാനീയം തയാറാക്കാം. രണ്ട് നെല്ലിക്കയും രണ്ട് മൂന്ന് വലിയ കഷണം ചിരങ്ങയും നന്നായി അരച്ച് പേസ്റ്റ് ആക്കി എടുക്കണം. അതിനുശേഷം ഇത് അരിച്ചെടുക്കണം. കുടിക്കുന്നതിനുമുമ്പ് രുചിക്കുവേണ്ടി കുറച്ച് തേൻ കൂടി ചേർക്കാം.

3.നെല്ലിക്ക നീര് വെള്ളത്തിൽ ചേർക്കുന്നത്‌-കൊളസ്‌ട്രോൾ നിയന്ത്രിക്കാൻ സഹായിക്കുന്ന മികച്ച ഒരു പാനീയമാണിത്. അര കപ്പ് നെല്ലിക്ക ജ്യൂസ് ഒരു ഗ്ലാസ് വെള്ളത്തിൽ ചേർക്കുക. ഇത് രാവിലെ വെറും വയറ്റിൽ കുടിക്കാം. ആവശ്യമെങ്കിൽ ഒരല്പം തേൻ കൂടെ ഇതിൽ ചേർക്കാവുന്നതാണ്. ശരീരഭാരം കുറയ്ക്കാനും ഈ ജ്യൂസ് നല്ലതാണ്.

ഇത് കൂടാതെ നെല്ലിക്ക നൽകുന്ന ആരോഗ്യ-സൗന്ദര്യ ഗുണങ്ങൾ എന്തൊക്കെയാണെന്ന് നോക്കാം.

1.ശരീര സൗന്ദര്യത്തിനും മുടിയഴകിനും-ശരീരത്തിന് ചെറുപ്പവും സൗന്ദര്യവും നൽകാൻ കഴിവുള്ളതാണ് നെല്ലിക്ക. രക്തത്തിലെ ഫ്രീ റാഡിക്കൽസിനെ നീക്കം ചെയ്ത് ത്വക്കിനെ സംരക്ഷിക്കുന്നു. കൂടാതെ മുടി നല്ല പോലെ വളരാനും അകാല നര നീക്കാനുമെല്ലാം ഇത് ഏറെ നല്ലതാണ്. നെല്ലിക്കയിൽ അടങ്ങിയ ആന്റിഓക്സിഡന്റുകൾ മുടിയിഴകൾ തഴച്ചു വളരാൻ സഹായിക്കും. ദിവസവും നെല്ലിക്ക കഴിക്കുകയോ അല്ലെങ്കിൽ ഒരു ഗ്ലാസ് നെല്ലിക്ക ജ്യൂസ് കുടിക്കുകയോ ചെയ്യുന്നത് മുടിയിഴകളുടെ ആരോഗ്യത്തിന് ഉത്തമമാണ്.

2.മൂത്രതടസ്സം അകറ്റാൻ-മൂത്ര തടസ്സത്തിനു പിന്നിൽ കാരണങ്ങൾ പലതാണ്. നെല്ലിക്ക നീര് കഴിക്കുന്നത് ഇത്തരത്തിലുള്ള പല അവസ്ഥകൾക്കും പരിഹാരമാകും. നെല്ലിക്ക നീരിൽ അൽപം തേൻ ചേർത്ത് കഴിച്ചാൽ മൂത്രാശയ അണുബാധ അകറ്റാൻ സഹായിക്കും.

3.ടെെപ്പ് 2 പ്രമേഹം നിയന്ത്രിക്കാം-ടെെപ്പ് 2 പ്രമേഹമുള്ളവർ ദിവസവും ഒരു നെല്ലിക്ക, ജ്യൂസായോ അല്ലാതെയോ കഴിക്കുന്നത് നല്ലതാണ്. നെല്ലിക്കയിലെ ഗാലിക് ആസിഡ്, ഗലോട്ടാനിൻ, എലജിക് ആസിഡ്, കോറിലാജിൻ എന്നിവ പ്രമേഹത്തെ തടയാൻ ഉത്തമമാണ്. രക്തത്തിലെ പഞ്ചസാരയുടെ അളവ് നിയന്ത്രിക്കാൻ നെല്ലിക്ക ജ്യൂസ് കുടിക്കുന്നത് ഗുണം ചെയ്യും.

4.വിളർച്ച തടയാം-ലിക്കാ നീരിൽ മഞ്ഞൾ ചേർത്ത് കഴിക്കുന്നത് ശരീരത്തിൽ രക്താംശം കൂട്ടുന്ന ഒന്നാണ്. ഇത് രക്തത്തിലെ ഹീമോഗ്ലോബിൻ തോതു വർദ്ധിപ്പിയ്ക്കും. വിളർച്ച അഥവാ അനീമിയ പോലുള്ള പ്രശ്‌നങ്ങൾക്കുള്ള നല്ലൊരു പ്രതിവിധിയാണിത്. ഇതുകൂടാതെ രക്തം ശുദ്ധീകരിയ്ക്കാനും രക്തപ്രവാഹം വർദ്ധിയ്ക്കാനുമെല്ലാം ഏറെ സഹായകമാണ്.

5.വായ്പുണ്ണ് മാറാൻ-നെല്ലിക്കയിൽ അടങ്ങിയിട്ടുള്ള ആന്റിഓക്സിഡന്റുകളും തെറാപ്യൂട്ടിക് ഘടകങ്ങളും വായ്പുണ്ണ് കുറയ്ക്കാൻ സഹായിക്കും.

6.മലബന്ധം അകറ്റാൻ-ഉദര സംബന്ധമായ പ്രശ്നങ്ങൾക്ക് നല്ലൊരു പ്രതിവിധിയാണ് നെല്ലിക്ക ജ്യൂസ്. രാവിലെ വെറുംവയറ്റിൽ നെല്ലിക്ക ജ്യൂസിൽ തേൻ ചേർത്ത് കുടിച്ചാൽ മലബന്ധവുമായി ബന്ധപ്പെട്ട പ്രശ്നങ്ങൾ തടയാം.

മുകളിൽ പറഞ്ഞ ഗുണങ്ങളെല്ലാം നെല്ലിക്ക ജ്യൂസിൽ അടങ്ങിയിട്ടുള്ളതിനാൽ ആരോഗ്യത്തിനും, സൗന്ദര്യത്തിനും വേണ്ടി ഇവ പതിവാക്കുന്നത് വളരെ നല്ലതാണ്.