സ്തനാർബുദ സാധ്യത കുറയ്ക്കാൻ സഹായിക്കുന്ന ചില ഭക്ഷണങ്ങൾ

ലോകമെമ്പാടുമുള്ള സ്ത്രീകളെ ബാധിക്കുന്ന ഏറ്റവും സാധാരണമായ ക്യാൻസർ തരമാണ് സ്തനാർബുദം. പതിവായി ആരോഗ്യപരിശോധനയും നേരത്തെയുള്ള തിരിച്ചറിയലും മാത്രമാണ് ഇതിനുള്ള ചികിത്സ. സ്തനാർബുദം വരാനുള്ള സാധ്യത കുറയ്ക്കുന്നതിന്, ആരോഗ്യകരമായ ജീവിതശൈലിയും പോഷക സമൃദ്ധമായ ഭക്ഷണക്രമവും ഒരു പരിധി വരെ സഹായിക്കും. ആന്റിഓക്‌സിഡന്റുകളും ഫൈബറും അടങ്ങിയ ഭക്ഷണങ്ങൾ ഈസ്ട്രജനെ നിയന്ത്രിക്കുന്നതിനും ക്യാൻസർ കോശങ്ങളുടെ രൂപവത്കരണത്തെ തടയുന്നതിനും സഹായകരമാണെന്ന് കണ്ടെത്തിയിട്ടുണ്ട്. സ്തനാർബുദ സാധ്യത കുറയ്ക്കുന്നതിന് ഭക്ഷണക്രമത്തിൽ ഉൾപ്പെടുത്താവുന്ന ചില സൂപ്പർഫുഡുകളുണ്ട്. അവ ഏതൊക്കെയാണെന്ന് പരിചയപ്പെടാം.

1.വാൾനട്ട്

വാൾനട്ടിൽ ഒമേഗ -3 ഫാറ്റി ആസിഡുകൾ, ആന്റിഓക്‌സിഡന്റുകൾ, ഫൈറ്റോസ്റ്റെറോളുകൾ എന്നിവ അടങ്ങിയിട്ടുണ്ട്, ഇത് ഈസ്ട്രജന്റെ അളവ് നിയന്ത്രിക്കാനും സ്തനാർബുദ കോശങ്ങളുടെ വളർച്ച മന്ദഗതിയിലാക്കാനും സഹായിക്കുന്നു. വാൾനട്ട് വീക്കം പ്രതിരോധിക്കാൻ സഹായിക്കുന്നതിന് ഫലപ്രദമാണെന്ന് അറിയപ്പെടുന്നു, ഇത് ഹൃദ്രോഗവും മറ്റ് വിട്ടുമാറാത്ത അവസ്ഥകളും ഒഴിവാക്കുന്നതിന് ഗുണം ചെയ്യും. ഒപ്പം, ക്യാൻസറുമായി ബന്ധപ്പെട്ട വീക്കങ്ങളും ഒഴിവാക്കുന്നു.

2.ബ്ലൂബെറി

ക്യാൻസർ കോശങ്ങളെ സ്വയം നശിപ്പിക്കുന്നതിലൂടെ സ്തനാർബുദ മുഴകളുടെ വളർച്ച കുറയ്ക്കാൻ ബ്ലൂബെറിക്ക് കഴിയുമെന്ന് ഗവേഷണം സൂചിപ്പിക്കുന്നു. ഈ പ്രക്രിയയെ അപ്പോപ്റ്റോസിസ് എന്ന് വിളിക്കുന്നു. ശീതീകരിച്ച കാട്ടു ബ്ലൂബെറി, ആന്റിഓക്‌സിഡന്റും പോഷകങ്ങളും നിറഞ്ഞതാണ്. സ്മൂത്തികൾ, ഓട്‌സ് അല്ലെങ്കിൽ തൈര് എന്നിവയിൽ ചേർത്ത് ബ്ലൂബെറി കഴിക്കാം.

3.മധുരക്കിഴങ്ങ്

മധുരക്കിഴങ്ങിന് ക്യാൻസർ വ്യാപനത്തെ തടയാനും കോശങ്ങളുടെ വളർച്ച നിയന്ത്രിക്കാനും പ്രതിരോധിക്കാനും നന്നാക്കാനും കഴിയും. സ്ഥിരമായി മധുരക്കിഴങ്ങ് കഴിക്കുന്ന സ്ത്രീകൾക്ക് സ്തനാർബുദം വരാനുള്ള സാധ്യത 17 ശതമാനം കുറവാണെന്ന് പഠനങ്ങൾ തെളിയിച്ചിട്ടുണ്ട്.

4.ചണവിത്തുകൾ

രക്തസമ്മർദ്ദം, കൊളസ്ട്രോൾ എന്നിവ കുറയ്ക്കുന്നതുൾപ്പെടെ എല്ലാത്തരം ആരോഗ്യഗുണങ്ങളും ചണവിത്തുകൾ അഥവാ ഫ്ളാക്സ് സീഡിന് ഉണ്ട്. ഒരുതരം ആന്റിഓക്‌സിഡന്റായ ലിഗ്നാനുകളുടെ ഏറ്റവും സമ്പന്നമായ ഉറവിടമാണ് ഫ്ളാക്സ് സീഡ്. സ്തനാർബുദം ബാധിച്ച രോഗികളിൽ ട്യൂമർ വളർച്ച കുറയ്ക്കാൻ ഡയറ്ററി ഫ്ളാക്സ് സീഡിന് കഴിവുണ്ട്. സ്മൂത്തികളിലേക്കോ യോഗർട്ടിലേക്കോ അല്ലെങ്കിൽ പ്രഭാതത്തിൽ കഴിക്കുന്ന ഓട്‌സിലേക്കോ ഫ്ളാക്സ് സീഡുകൾ ചേർക്കാം.

5.വെളുത്തുള്ളി

വെളുത്തുള്ളി ക്യാൻസർ കോശങ്ങളുടെ വിഭജനത്തെ തടസ്സപ്പെടുത്തുന്നതിന് ഫലപ്രദമാണെന്ന് പറയപ്പെടുന്നു. വെളുത്തുള്ളിയുടെ ഒരു ഘടകമായ അല്ലിസിൻ ആണ് ക്യാൻസറിനെ നശിപ്പിക്കുന്നത്. കൂടാതെ ഇവ ശ്വാസകോശം, ആമാശയം, പ്രോസ്റ്റേറ്റ് എന്നിവിടങ്ങളിലെ ക്യാൻസർ സാധ്യത കുറയ്ക്കുമെന്നും വിവിധ പഠനങ്ങളിൽ പറയുന്നു. ഇത് വെളുത്തുള്ളിയിൽ അടങ്ങിയിരിക്കുന്ന ഫ്ലേവനോളുകൾ കാരണമാകാം. വെളുത്തുള്ളി പച്ചയ്ക്ക് കഴിക്കുന്നത് ക്യാൻസർ വിരുദ്ധ ഫലങ്ങൾ വർദ്ധിപ്പിക്കും.

6.ഗ്രീൻ ടീ

ധാരാളം ആരോഗ്യഗുണങ്ങളുള്ള ആൻറി ഓക്സിഡൻറുകളാണ് ഗ്രീൻ ടീയിൽ അടങ്ങിയിരിക്കുന്നത്. അത്തരം ആൻറി ഓക്സിഡൻറുകളിലൊന്നിൽ സ്തനാർബുദം തടയുന്ന ഗുണങ്ങൾ ഉൾക്കൊള്ളുന്നു.

ലോകാരോഗ്യ സംഘടനയുടെ കണക്കുകൾ പ്രകാരം സ്തനാർബുദം ബാധിക്കുന്നവരുടെ എണ്ണം വർഷം തോറും കൂടിവരുകയാണ്. സ്ത്രീകളുടെ മരണനിരക്ക് പരിശോധിച്ചാൽ മുന്നിട്ട് നിൽക്കുന്ന കാരണവും സ്തനാർബുദം തന്നെയാണ്. അതിനാൽ ഭക്ഷണക്രമത്തിലെ, കൊഴുപ്പുള്ള ഭക്ഷണങ്ങളുടെ അളവ് കുറയ്ക്കുകയും, അവയ്ക്ക് പകരം മുഴു ധാന്യങ്ങൾ പോലുള്ള ഭക്ഷണങ്ങൾ കഴിക്കുകയും ചെയ്യുന്നത് അപകടസാധ്യത കുറയ്ക്കുകയും സ്തനാർബുദ രോഗികളുടെ അതിജീവന നിരക്ക് മെച്ചപ്പെടുത്തുകയും ചെയ്യും. ഒരൊറ്റ ഭക്ഷണവും സ്വയം ക്യാൻസർ വിമുക്തമായി സംരക്ഷിക്കുമെന്ന് ഉറപ്പുനൽകുന്നില്ലെങ്കിലും, സ്തനാർബുദത്തിനെതിരെ പോരാടാൻ സഹായിക്കുന്ന ഈ ഫലപ്രദവും ആരോഗ്യകരവുമായ ഭക്ഷണങ്ങൾ, ഭക്ഷണക്രമത്തിൽ കൂടുതൽ ഉൾപ്പെടുത്തുന്നത് തീർച്ചയായും ഗുണം ചെയ്യും.