കൊവിഡ് 19-നെ കൂടുതൽ അപകടകാരിയാക്കുന്ന ന്യുമോണിയയെ നേരത്തെ തിരിച്ചറിയാം

കൊവിഡ് 19 ബാധിക്കുന്നവരിൽ ഏറ്റവും കൂടുതൽ കണ്ടു വരുന്ന മരണ കാരണമാകുന്ന അവസ്ഥയാണ് ന്യുമോണിയ. ചുമ, പനി, ശ്വാസം മുട്ടൽ തുടങ്ങിയ ലക്ഷണങ്ങളാണ് ന്യൂമോണിയ ബാധിച്ചവരിൽ കണ്ടു വരുന്നത്. ചിലരിൽ നേരത്തെ ലക്ഷണങ്ങൾ പ്രകടമാകുമ്പോൾ, മറ്റു ചിലരിലാകട്ടെ അവസ്ഥയുടെ മൂർദ്ധന്യാവസ്ഥയിൽ മാത്രമാണ് രോഗ തീവ്രത തിരിച്ചറിയുന്നത്. സാധാരണ ന്യൂമോണിയായേക്കാൾ നാലിരട്ടി മാരകമാണ് കൊവിഡ് ബാധയെ തുടർന്ന് ശ്വാസകോശത്തെ ബാധിക്കുന്ന ന്യൂമോണിയ.

ശ്വാസകോശത്തിനുള്ളിലെ ചെറിയ വായു അറകളിൽ വീക്കം ഉണ്ടാക്കുന്ന ശ്വാസകോശ അണുബാധയാണ് ന്യുമോണിയ. ദ്രാവകവും പഴുപ്പും കൊണ്ട് ശ്വാസകോശം നിറഞ്ഞേക്കാം, ഇത് ശ്വാസനം തടസപ്പെടുത്തുന്നു. കടുത്ത ശ്വാസം മുട്ടൽ, ചുമ, പനി, നെഞ്ചുവേദന, ജലദോഷം അല്ലെങ്കിൽ ക്ഷീണം എന്നിവ ഉണ്ടാകാം. ന്യൂമോണിയയെ അതിജീവിക്കാനുള്ള മരുന്നുകളാണ് ആദ്യഘട്ടത്തിൽ നൽകുന്നത്. എന്നാൽ ഏറ്റവും ഗുരുതരമായ കേസുകളിൽ, വെന്റിലേറ്റർ ഉപയോഗിച്ച് ശ്വസനം സാധ്യമാക്കുകയാണ് ചെയ്യാനുള്ളത്. അതുകൊണ്ട് തന്നെ ന്യൂമോണിയ പിടിപെട്ടാൽ ആശുപത്രിവാസം അത്യാവശ്യമായി വരികയും ചെയ്യും. COVID-19 അല്ലെങ്കിൽ ഇൻഫ്ലുവൻസ പോലുള്ള വൈറൽ അണുബാധകളുടെ തുടർഫലമായി ന്യുമോണിയ ബാധിക്കും. എന്നാൽ ബാക്ടീരിയ, ഫംഗസ്, മറ്റ് സൂക്ഷ്മാണുക്കൾ എന്നിവയും ന്യുമോണിയ ഉണ്ടാകുന്നതിന് കാരണമാകും. കൊറോണ ബാധയെ തുടർന്നുണ്ടാകുന്ന ന്യൂമോണിയ പലരിലും തുടക്കത്തിൽ അറിയാതെ പോകുന്നു എന്നതാണ് സത്യാവസ്ഥ. നേരിയ ലക്ഷണങ്ങൾ ശ്രദ്ധയിൽ പെടാത്തത് തന്നെയാണ് ഇതിന് കാരണവും.

പനി, വരണ്ട ചുമ, ശ്വാസം മുട്ടൽ എന്നിവ COVID-19 ന്റെ ആദ്യഘട്ട ലക്ഷണങ്ങളാണ്. മറ്റ് ചില അസ്വസ്ഥതകളും അനുഭവപ്പെട്ടേക്കാം. കൂടാതെ ഇവയും ഉണ്ടായിരിക്കാം.

1.ക്ഷീണം

2.ഓക്കാനം അല്ലെങ്കിൽ ഛർദ്ദി

3.അതിസാരം

4.വയറുവേദന

5.പേശി വേദന അല്ലെങ്കിൽ ശരീരവേദന

6.തലവേദന

7.മണം അല്ലെങ്കിൽ രുചി നഷ്ടപ്പെടുന്നു

8.തൊണ്ടവേദന

9.മൂക്കൊലിപ്പ്

10.ശരീരത്തിൽ ചുവന്ന പാടുകൾ

11.ചർമ്മത്തിൽ തിണർപ്പ് കാണപ്പെടുന്ന അവസ്ഥ

COVID-19 ന്യുമോണിയ ലക്ഷണങ്ങൾ

1.വേഗത്തിലുള്ള ഹൃദയമിടിപ്പ്

2.ശ്വാസം മുട്ടൽ അല്ലെങ്കിൽ ശ്വാസതടസ്സം

3.വേഗത്തിലുള്ള ശ്വസനം

4.തലകറക്കം

5.കനത്ത വിയർപ്പ്

കൊവിഡ് -19 കേസുകളിൽ 15% പേർക്കും അവസ്ഥ കഠിനമാണ്. അതിനർത്ഥം ആശുപത്രി വാസവും ഓക്സിജൻ ലഭ്യതയും ഉറപ്പാക്കേണ്ടി വരാം എന്നതാണ്. ഏകദേശം 5% ആളുകൾക്ക് ഗുരുതരമായ അണുബാധ ഏൽക്കുന്നുണ്ട്, അവർക്ക് വെന്റിലേറ്റർ ആവശ്യമാണ്. ന്യുമോണിയ ബാധിച്ച ആളുകൾക്ക് അക്യൂട്ട് റെസ്പിറേറ്ററി ഡിസ്ട്രസ് സിൻഡ്രോം (ARDS) എന്ന അവസ്ഥയും ഉണ്ടാകാം. ഇത് വേഗത്തിൽ വരുന്നതും ശ്വസന പ്രശ്നങ്ങൾ ഉണ്ടാക്കുന്നതുമായ ഒരു അവസ്ഥയാണ്.

പുതിയ കൊറോണ വൈറസ് ശ്വാസകോശത്തിൽ കടുത്ത വീക്കം ഉണ്ടാക്കുന്നു. ഇത് ശ്വാസകോശത്തിലെ വായു അറകളെ ഉൾക്കൊള്ളുന്ന കോശങ്ങളെയും ടിഷ്യുവിനെയും നശിപ്പിക്കുന്നു. ശ്വസിക്കുന്ന ഓക്സിജൻ സംസ്കരിച്ച് രക്തത്തിലേക്ക് എത്തിക്കുന്ന ഇടമാണ് അറകൾ. അണുബാധ ഉണ്ടാവുന്നത് കാരണം ടിഷ്യു പൊട്ടുകയും ശ്വാസകോശത്തിന്റെ പ്രവർത്തനം തടസ്സപ്പെടുത്തുകയും ചെയ്യുന്നു. ആർക്കും COVID-19 ന്യുമോണിയ ബാധിക്കാം , പക്ഷേ 65 വയസോ അതിൽ കൂടുതലോ പ്രായമുള്ളവരിലാണ് ഏറ്റവും കൂടുതൽ കണ്ടുവരുന്നത്‌. 85 വയസോ അതിൽ കൂടുതലോ പ്രായമുള്ളവരിൽ ഏറ്റവും കൂടുതൽ അപകടസാധ്യതയുമുണ്ട്. കൂടാതെ കൊവിഡ് ബാധയോടൊപ്പം മറ്റ് ആരോഗ്യപ്രശ്നങ്ങൾ ഉള്ളവർക്കും ന്യൂമോണിയ വരാനുള്ള സാധ്യത കൂടുതലാണ്, അവയിൽ അപകടകരമാകുന്ന ചിലത് താഴെപ്പറയുന്നവയാണ്.

1.കടുത്ത ആസ്ത്മ

2.ശ്വാസകോശ രോഗം

3.ഉയർന്ന രക്തസമ്മർദ്ദം

4.ഹൃദ്രോഗം

5.പ്രമേഹം

6.കരൾ രോഗം

7.കിഡ്നി തകരാർ

8.അമിതവണ്ണം, അല്ലെങ്കിൽ 40-ൽ കൂടുതലുള്ള ബോഡി മാസ് സൂചിക (ബി‌എം‌ഐ)

രോഗപ്രതിരോധ ശേഷി ദുർബലമായ ആളുകളിൽ കൊവിഡ് ബാധയും അതിനെ തുടർന്നുള്ള ന്യൂമോണിയയും വരാനുള്ള സാധ്യത കൂടുതലാണ്. പുകവലിക്കാർ, ക്യാൻസറിനായി ചികിത്സിക്കുന്ന ആളുകൾ, അസ്ഥി മജ്ജ മാറ്റിവയ്ക്കൽ നടത്തിയ ആളുകൾ, എച്ച്ഐവി അല്ലെങ്കിൽ എയ്ഡ്സ് ബാധിച്ച ആളുകൾ, രോഗപ്രതിരോധ ശേഷി കുറയ്ക്കുന്ന മരുന്നുകൾ എടുക്കുന്നവർ, ഏറെ നാളായി സ്റ്റിറോയിഡുകൾ ഉപയോഗിക്കുന്നവർ എന്നിവർ ഇതിൽ ഉൾപ്പെടുന്നു.

കൊവിഡ് ന്യുമോണിയ രോഗനിർണയം എങ്ങനെ?

ശരീരം പ്രകടമാക്കുന്ന ലക്ഷണങ്ങളെയും ലാബ് പരിശോധന ഫലങ്ങളെയും അടിസ്ഥാനമാക്കി ഡോക്ടർക്ക് കൊവിഡ് ന്യുമോണിയ നിർണ്ണയിക്കാൻ കഴിയും. രക്തപരിശോധനയിൽ നിന്നും കൊവിഡ് ന്യുമോണിയയുടെ ലക്ഷണങ്ങളും കാണാം. കുറഞ്ഞ ലിംഫോസൈറ്റുകളും എലവേറ്റഡ് സി-റിയാക്ടീവ് പ്രോട്ടീനും (സിആർ‌പി) ഇതിന്റെ ലക്ഷണങ്ങളിൽ ഉൾപ്പെടുന്നു. രക്തത്തിൽ ഓക്സിജനും കുറവായിരിക്കാം. ശ്വാസകോശത്തിന്റെ നിലവിലെ അവസ്ഥ തിരിച്ചറിയാൻ സിടി സ്കാൻ എടുക്കുന്നത് കൂടുതൽ സഹായകരമാകും.

കൊവിഡ് ന്യുമോണിയക്കുള്ള ചികിത്സ

ന്യുമോണിയയ്ക്ക് ഓക്സിജൻ ഉള്ള ഒരു ആശുപത്രിയിൽ ചികിത്സ ആവശ്യമാണ്, ശ്വസിക്കാൻ സഹായിക്കുന്നതിനായി വെന്റിലേറ്റർ സംവിധാനവും ഉറപ്പ് വരുത്തണം.

കൊവിഡ് ന്യുമോണിയ പ്രതിരോധം

1.കൊവിഡ് ന്യൂമോണിയ ബാധിക്കാൻ സാധ്യതയുള്ള ഗ്രൂപ്പിലാണെങ്കിൽ, അണുബാധ തടയുന്നതിന് പ്രത്യേകം ശ്രദ്ധിക്കുക.

2.കൈകൾ ഇടയ്ക്കിടെ കഴുകുക. കുറഞ്ഞത് 20 സെക്കൻഡ് സോപ്പും വെള്ളവും ഉപയോഗിച്ച് സ്‌ക്രബ് ചെയ്യുക.

3.കൈ കഴുകാൻ കഴിയുന്നില്ലെങ്കിൽ, കുറഞ്ഞത് 70% ആൾക്കാഹോൾ അടങ്ങിയ ഒരു ഹാൻഡ് സാനിറ്റൈസർ ഉപയോഗിക്കുക.

4.കൈകൾ വൃത്തിയായി കഴുകുന്നതുവരെ മുഖം, വായ, കണ്ണുകൾ എന്നിവ തൊടാതിരിക്കാൻ ശ്രമിക്കുക.

5.രോഗിയായവരിൽ നിന്നും രോഗ സാധ്യതയുള്ളവരിൽ നിന്നും അകലം പാലിക്കുക.

6.പുറത്തു പോകേണ്ടിവന്നാൽ ഡബിൾ മാസ്ക് ശീലമാക്കുക.

7.പതിവായി ഉപയോഗിക്കുന്ന, പലരും കൈകൾ കൊണ്ട് സ്പർശിക്കുന്ന പ്രതലങ്ങളെല്ലാം പതിവായി വൃത്തിയാക്കുകയും അണുവിമുക്തമാക്കുകയും ചെയ്യുക.

കൊവിഡ് ന്യുമോണിയ തുടക്കത്തിൽ തന്നെ തിരിച്ചറിയുകയും ചികിത്സ ലഭ്യമാക്കുകയും ചെയ്തില്ലെങ്കിൽ മരണത്തിലേക്ക് നയിക്കുന്ന അവസ്ഥയിലേയ്ക്ക് മാറും. അതിനാൽ ലക്ഷണങ്ങൾ കണ്ടു തുടങ്ങിയാൽ ഉടൻ തന്നെ വൈദ്യ സഹായം ഉറപ്പാക്കേണ്ടതാണ്.

➖➖➖➖➖➖➖

ആൽഫ ലബോറട്ടറയിൽ എല്ലാ ലാബ്ടെസ്റ്റുകൾക്കും 100% കൃത്യത.

ലാബ് ടെസ്റ്റുകളുടെ ബ്ലഡ് കളക്ഷൻ വീട്ടിൽ എത്തി ചെയ്യുന്നു.

➖➖➖➖➖➖➖

എല്ലാ ഹോസ്പിറ്റലിലെയും ഏതു ഡോക്ടർ എഴുതിയ മരുന്നുകളും വീട്ടിൽ എത്തിച്ചു തരുന്നു ആൽഫ ഫാർമസി

➖➖➖➖➖➖➖

കൂടുതൽ അന്യേഷണങ്ങൾക്കും ബുക്കിംഗിനും whats Appലൂടെ മെസേജ് അയക്കാൻ ഇവിടെ ക്ലിക്ക് ചെയ്യൂ ..

ആൽഫ മെഡികെയർ : 9744568762