നവജാത ശിശുക്കളുടെ ആരോഗ്യം നന്നാവാൻ അമ്മമാർ ഇവ ശീലമാക്കുക

ഒരു അമ്മയാവുക എന്നത് സിനിമയിലും പരസ്യത്തിലും കാണിക്കുന്നത് പോലെ അത്ര സുഖമുള്ള കാര്യമൊന്നുമല്ല. അതിന്റെ ബുദ്ധിമുട്ടുകള്‍ കൃത്യമായി മനസ്സിലാകുന്നത് അമ്മമാര്‍ക്ക് മാത്രമായിരിക്കും. ഒരു സ്ത്രീ ഗര്‍ഭിണി ആയിരിക്കുന്നതിനേക്കാള്‍ ബുദ്ധിമുട്ടാണ് കുഞ്ഞിനെ നോക്കുന്നത്. അമ്മമാരുടെ ശാരീരികമായിട്ടുള്ള ആരോഗ്യം മാത്രമല്ല, മാനസികാരോഗ്യവും ഒരു കുഞ്ഞിനുവേണ്ടി പണയം വെക്കുന്നുണ്ട്. അമ്മമാര്‍ പലപ്പോഴും കുഞ്ഞിന്റെ ആരോഗ്യത്തിന് പ്രാധാന്യം നല്‍കുന്നു. നമ്മള്‍ മുതിര്‍ന്നവരെപ്പോലെയല്ല കുഞ്ഞുങ്ങള്‍. ഇവര്‍ എപ്പോള്‍ ഉറങ്ങും, എപ്പോള്‍ എഴുന്നേല്‍ക്കും എന്ന് ആര്‍ക്കും മുന്‍കൂട്ടി പറയാന്‍ സാധിക്കില്ല.

ഇത്തരത്തില്‍ കുഞ്ഞുങ്ങളുടെ ഉറക്കത്തിനനുസരിച്ച് അമ്മമാരുടെ ഉറക്കത്തിലും വ്യത്യാസം വന്ന് തുടങ്ങുന്നു. ഇതെല്ലാം ഇവരുടെ ആരോഗ്യത്തെ ബാധിക്കുന്നുണ്ട്. ഇവ ഒഴിവാക്കി നല്ല ആരോഗ്യത്തോടെ ഇരിക്കാന്‍ അമ്മമാര്‍ ശ്രദ്ധിക്കേണ്ട കാര്യങ്ങള്‍ എന്തെല്ലാമെന്ന് നോക്കാം.

കുഞ്ഞിന് മുലപ്പാലില്‍ നിന്നും പോഷകങ്ങള്‍ ലഭിക്കും. എന്നാല്‍, അമ്മമാര്‍ക്കും കുഞ്ഞിന് എന്നത് പോലെ പോഷകങ്ങള്‍ ലഭിക്കേണ്ടത് അനിവാര്യമാണ്. അതിനാല്‍ നല്ലപോലെ ധാന്യങ്ങള്‍, പഴം പച്ചക്കറികള്‍, നട്‌സ് എന്നിവയെല്ലാം ആഹാരത്തില്‍ ഉള്‍പ്പെടുത്താന്‍ ശ്രദ്ധിക്കണം.

അമ്മമാര്‍ക്ക് കൃത്യമായി പ്രോട്ടീന്‍, അയേണ്‍, കാല്‍സ്യം എന്നിവ ശരീരത്തില്‍ എത്തേണ്ടത് അനിവാര്യമാണ്. പ്രത്യേകിച്ച് മുലയൂട്ടുന്ന അമ്മമാര്‍ ആണെങ്കില്‍ ഇവര്‍ക്ക് ഈ പോഷകങ്ങള്‍ ശരീരത്തില്‍ എത്തിയാല്‍ മാത്രമാണ്, നല്ല ആരോഗ്യം കുഞ്ഞ് വളരുന്നതിന്റെ കൂടെ നേടിയെടുക്കാന്‍ സാധിക്കുകയുള്ളൂ. അമ്മയ്ക്ക് ആരോഗ്യം ഉണ്ടായാല്‍ മാത്രമേ, കുഞ്ഞിനും ആരോഗ്യം ഉണ്ടാവുകയുള്ളൂ.

കൃത്യമായ രീതിയില്‍ വിശ്രമം എടുക്കേണ്ടത് അനിവാര്യമായിട്ടുള്ള കാര്യമാണ്. പലപ്പോഴും ചെറിയ കുട്ടികള്‍ ഉള്ള അമ്മമാര്‍ക്ക് വിശ്രമം എന്നത് ഒരു കിട്ടാകനിയാണ്. കുഞ്ഞ് ഉറങ്ങിയാലും ചിലപ്പോള്‍ പെട്ടെന്ന് തന്നെ എഴുന്നേല്‍ക്കുന്നത്, വാശിപിടിക്കുന്നത്, മറ്റുള്ളവരുടെ അടുത്ത് പോകാതിരിക്കുന്നതെല്ലാം തന്നെ അമ്മയുടെ വിശ്രമത്തെ കെടുത്തുന്ന കാര്യങ്ങളാണ്. ശരീരത്തിന് കൃത്യമായ രീതിയില്‍ ഉറക്കവും വിശ്രമവും ലഭിച്ചില്ലെങ്കില്‍ ഇവരുടെ മാനസിക നില അവതാളത്തില്‍ ആകാന്‍ തുടങ്ങും. ആരോഗ്യം പതിയെ നഷ്ടപ്പെടാന്‍ തുടങ്ങും. ചിലപ്പോള്‍ ഡിപ്രഷന്‍ ഉണ്ടാക്കാം. ഇതെല്ലാം തന്നെ കുഞ്ഞിനോട് ദേഷ്യം വര്‍ദ്ധിപ്പിക്കാന്‍ കാരണമാകാം. അതിനാല്‍ അമ്മമാര്‍ കുറഞ്ഞത് 6 മണിക്കൂര്‍ ഉറക്കം ഉറപ്പ് വരുത്തേണ്ടത് അനിവാര്യമാണ്.

പ്രസവത്തിന് ശേഷം ചെറിയ രീതിയില്‍ വ്യായാമം ചെയ്ത് തുടങ്ങുന്നത് നല്ലതാണ്. ആരോഗ്യം ഫിറ്റാക്കി നിര്‍ത്താന്‍ മാത്രമല്ല, മാനസികാരോഗ്യം മെച്ചപ്പെടുത്താനും ഇത് സഹായിക്കുന്നുണ്ട്. അമിതമായി വ്യായാമം ചെയ്യണം എന്നല്ല, മറിച്ച് ചെറിയ രീതിയില്‍ സ്‌ട്രെച്ചിംഗ് ചെയ്യുന്നത് നല്ലതാണ്.

അമ്മമാര്‍ക്ക് തുടക്കത്തില്‍ ആഴ്ച്ചയില്‍ മൂന്ന് തവണ വീതം വ്യായാമം ചെയ്യാവുന്നതാണ്. കുറഞ്ഞത് 30 മിനിറ്റെങ്കിലും വ്യായാമം ചെയ്യാന്‍ ശ്രദ്ധിക്കണം. അതുപോലെ, ആദ്യത്തെ 10 മിനിറ്റ് വാം അപ്പ് ചെയ്ത് വേണം വ്യായാമം ആരംഭിക്കാന്‍. എല്ലായ്‌പ്പോഴും കുഞ്ഞിന് മുലയൂട്ടാന്‍ ആരംഭിക്കുന്നതിന് മുന്‍പ് വ്യായാമം ചെയ്യുന്നതാണ് നല്ലത്.

ഇത്തരത്തില്‍ വ്യായാമം ചെയ്ത് ശീലിക്കുന്നത് ശരീരഭാരം കുറയ്ക്കാനും നല്ല ആരോഗ്യകരമായ ശരീരഭാരം നിലനിര്‍ത്തുന്നതിനും സഹായിക്കുന്നുണ്ട്. ഇത് പലതരം അസുഖങ്ങള്‍ കുറയ്ക്കാനും സഹായിക്കുന്നു.

പ്രസവത്തിന് ശേഷം വയര്‍ ചുരുങ്ങാന്‍ കുറഞ്ഞത് ആറ് മുതല്‍ എട്ട് ആഴ്ച്ചയെങ്കിലും എടുക്കും. എന്നാല്‍, ഇത് കുറച്ചും കൂടെ വേഗത്തില്‍ ആക്കി എടുക്കാന്‍ വയറിന് ചുറ്റും മസാജ് ചെയ്ത് കൊടുക്കുന്നത് നല്ലതാണ്. ഇത്തരത്തില്‍ മസാജ് ചെയ്യുമ്പോള്‍ ശ്രദ്ധിക്കേണ്ട കുറച്ച് കാര്യങ്ങളുണ്ട്. അതില്‍ തന്നെ പ്രധാനപ്പെട്ടതാണ് നല്ല സെര്‍ട്ടിഫൈഡ് ആയിട്ടുള്ള ആളെകൊണ്ട് മാത്രം മസാജ് ചെയ്യിപ്പിക്കുക. നമ്മള്‍ സ്വയം മസാജ് ചെയ്യുന്നതും ചിലപ്പോള്‍ രക്തസ്രാവം ഉണ്ടാകുന്നതിന് കാരണമായേക്കാം. അതിനാല്‍ ഇതില്‍ കുറച്ച് ശ്രദ്ധ ചെലുത്താന്‍ പരമാവധി ശ്രദ്ധിക്കുക.

മാനസികാരോഗ്യം വളരെ പ്രധാനപ്പെട്ട കാര്യമാണ്. പലപ്പോഴും പലരും ശ്രദ്ധിക്കാതെ പോകുന്ന ഒരു കാര്യം കൂടിയാണ് ഇത്. പലര്‍ക്കും പ്രസവത്തിന് ശേഷം പോസ്റ്റ് പാര്‍ട്ടം ഡിപ്രഷന്‍ കണ്ട് വരുന്നുണ്ട്. ഈ സന്ദര്‍ഭത്തില്‍ സൂഹൃത്തുക്കളുടെ, ഭര്‍ത്താവിന്റെ അല്ലെങ്കില്‍ വീട്ടുകാരുടെ സഹായം തേടാവുന്നതാണ്. ഇത് ഡിപ്രഷനില്‍ നിന്നും പിടിച്ച് കയറ്റാന്‍ സഹായിക്കും.

അതുപോലെ, ഒറ്റയ്ക്ക് ഇരിക്കാതിരിക്കാന്‍ ശ്രദ്ധിക്കാം. വീട്ടുകാരുടെ കൂടെ ഇരിക്കുന്നത് കുട്ടിയെ കുറിച്ചുള്ള ടെന്‍ഷന്‍ കുറയ്ക്കാന്‍ സഹായിക്കും. കുട്ടിയെ നോക്കാന്‍ ആള്‍ക്കാര്‍ ഉണ്ട് എന്ന ചിന്ത വരുന്നതും മാനസികമായി ആശ്വാസം നല്‍കുന്ന കുറച്ച് കാര്യങ്ങളാണ്. അതല്ലെങ്കില്‍ ക്ലിനിക്കല്‍ സഹായവും തേടാവുന്നതാണ്.