ഭക്ഷണ ശേഷം അൽപ നേരം നടക്കുന്നത് ശീലമാക്കാം

ഭക്ഷണം കഴിച്ച ഉടൻ എവിടെയെങ്കിലും ഇരിക്കാനോ അല്ലെങ്കിൽ ഒന്ന് കിടക്കാനോ ആണ് മിക്കവരും ആഗ്രഹിക്കാറുള്ളത്. പ്രത്യേകിച്ച് അമിതമായി കഴിക്കുമ്പോൾ. ഊണ് കഴിഞ്ഞ് ഒരു മയക്കം പതിവാക്കിയവർ ധാരാളമുണ്ട്. എന്നാൽ ഒരാളെ രോഗിയാക്കാൻ ഈ ഒരൊറ്റ ശീലം മാത്രം മതി. അസിഡിറ്റി പോലുള്ള പ്രശ്നങ്ങളിൽ നിന്നാണ് ശാരീരിക പ്രശ്നങ്ങൾ ആരംഭിക്കുക. പിന്നീട് ഗുരുതരമായ രോഗങ്ങളിലേയ്ക്ക് ഇത് വഴിവെക്കുകയും ചെയ്യും. അതുകൊണ്ട് തന്നെ ഭക്ഷണം കഴിച്ച നേരം അര മണിക്കൂർ നടത്തം പതിവാക്കുന്നത് നല്ല ശീലമാണ്. കുറഞ്ഞത് 10 മിനിറ്റെങ്കിലും.

ഭക്ഷണം കഴിച്ച ശേഷം അൽപനേരം നടക്കുന്നത് ഹൃദയാരോഗ്യം മെച്ചപ്പെടുത്തും. 30,000 ആളുകളിൽ നടത്തിയ പഠന ഫലം ഇക്കാര്യം വ്യക്തമാക്കുന്നുണ്ട്. ആഴ്ചയിൽ 5 ദിവസം ഭക്ഷണ ശേഷം അര മണിക്കൂർ നടത്തം ശീലിച്ചവരിൽ ഹൃദയ സംബന്ധമായ പ്രശ്നങ്ങൾ 20 ശതമാനം കുറവാണ് എന്ന് കണ്ടെത്തി.

ഒരിക്കലും ഒഴിഞ്ഞ വയറിൽ നടക്കുന്നത് പോലെ അതിവേഗത്തിലോ, ജോഗിംഗ് പോലെയോ ഭക്ഷണം കഴിച്ച ഉടൻ നടക്കരുത്. ഭക്ഷണം കഴിച്ച ഉടൻ അമിതവേഗത്തിൽ നടക്കുന്നത് വിപരീത ഫലം നൽകും എന്ന കാര്യം ഓർക്കുക. അതിനാൽ മിതമായ രീതിയിൽ മാത്രം നടക്കാം. വീടിന് പുറത്ത് നടക്കാൻ സാഹചര്യമില്ലെങ്കിൽ വീടിന് അകത്ത് നിശ്ചിത സമയം നടക്കുന്നതും പ്രയോജനം ചെയ്യും. ഭക്ഷണം കഴിച്ച ഉടനെയുള്ള നടത്തത്തിന്റെ ആരോഗ്യ ഗുണങ്ങൾ എന്തൊക്കെയാണെന്ന് നോക്കാം.

1.നടത്തം ദഹന പ്രക്രിയ സുഗമമാക്കാൻ സഹായിക്കും. കഴിക്കുന്ന ഭക്ഷണം അതിവേഗത്തിൽ ദഹിക്കാൻ 30 മിനിറ്റ് നടത്തം സഹായിക്കും, ഇത് ദഹന സംബന്ധമായ അസുഖങ്ങൾ ഇല്ലാതാക്കുകയും ചെയ്യും. ഭക്ഷണം കഴിച്ച ഉടൻ അലസമായി ഇരിക്കുകയോ, കിടക്കുകയോ ചെയ്‌താൽ ദഹന സംബന്ധമായ അസ്വസ്ഥതകൾ ഉണ്ടാകും.

2.ഭക്ഷണ ശേഷം നടക്കുന്നത് ശരീരത്തിൻറെ മെറ്റബോളിസം വർധിപ്പിക്കാനും അമിതമായ കലോറി എരിച്ചു കളയാനും സഹായിക്കുന്നു.

3.ഭക്ഷണ ശേഷമുള്ള നടത്തം ശരീരത്തിൽ രക്തയോട്ടം മെച്ചപ്പെടുത്താനും, അലസത മാറ്റാനും, കൂടുതൽ ഊർജ്ജസ്വലമാകാനും സഹായിക്കുന്നു.

4.ഭക്ഷണം ആമാശയത്തിലെത്തി ദഹന പ്രക്രിയ ആരംഭിക്കാൻ തുടങ്ങുമ്പോൾ തന്നെ ആഹാരം വിഘടിയ്ക്കാൻ തുടങ്ങുന്നതിനാൽ ശരീരത്തിലെ ഷുഗർ ലെവൽ ഉയരാറുണ്ട്. ഇത് പരിഹരിയ്ക്കാനും ഭക്ഷണ ശേഷമുള്ള നടത്തം പ്രയോജനം ചെയ്യും.

ഭക്ഷണ ശേഷമുള്ള നടത്തം ശ്രദ്ധയോടെ വേണം. അമിതമാകാൻ പാടില്ല, അതുകൊണ്ട് തന്നെ എത്ര സമയം എങ്ങനെ നടക്കണം തുടങ്ങിയ കാര്യങ്ങൾ ശ്രദ്ധിക്കണം. ഓരോ തവണയും ഭക്ഷണം കഴിച്ച ശേഷം, അതായത് ദിവസം 3 നേരവും 10 മിനിറ്റ് നേരം വീതം നടക്കുകയാണ് നല്ലത്. ഇങ്ങനെ വരുമ്പോൾ ദിവസം 30 മിനിറ്റ് നേരം നടക്കും. 10 മിനിറ്റ് വളരെ കുറഞ്ഞ സമയം എന്ന് തോന്നുമെങ്കിലും ഇത് ആരോഗ്യത്തിന് ഒരുപാട് ഗുണം ചെയ്യും. വേണമെങ്കിൽ 15 മിനിറ്റ് നേരം നടക്കുന്നതും നല്ലതാണ്, എന്നാൽ ഇതിനപ്പുറം ഭക്ഷണ ശേഷം നടക്കേണ്ടതില്ല. പത്ത് മിനിറ്റ് നേരം ഓരോ തവണയും ഭക്ഷണം കഴിച്ച ശേഷം നടക്കുമ്പോൾ ദഹന പ്രക്രിയ കൃത്യമായി നടക്കുകയും ആമാശയ സംബന്ധമായ പ്രശ്നങ്ങൾ പരിഹരിക്കപ്പെടുകയും ചെയ്യും. ഇതുവഴി അമിത വണ്ണം ഒഴിവാക്കാനും സാധിക്കും.

നടത്തം നല്ല ശീലമാണെന്ന് കേട്ട ഉടൻ നന്നായി കുറെ നേരം നടന്ന് ആരോഗ്യം കൂട്ടാം എന്ന് ധരിക്കരുത്. ഏത് ശീലമാണെങ്കിലും പതുക്കെ തുടങ്ങി പിന്നീട് വേഗം കൂട്ടുകയാണ് നല്ലത്. നടത്തവും അങ്ങനെ തന്നെയാണ്.