ക്യാൻസറും മൊബൈൽ ഫോൺ ഉപയോഗവും തമ്മിൽ എന്തെങ്കിലും ബന്ധമുണ്ടോ?

ഇന്ത്യ അടുത്ത തലമുറ നെറ്റ്‌വർക്കായ 5ജിയിലേക്ക് (5G) കടന്നിരിക്കുകയാണ്. എയർടെൽ, ജിയോ എന്നിവ ചില നഗരങ്ങളിലെങ്കിലും 5ജി ലഭ്യമാക്കിയിരിക്കുന്നു. ഈ അവസരത്തിൽ 5ജിയുടെ റേഡിയേഷനുമായി ബന്ധപ്പെട്ട ചർച്ചകൾ പിന്നെയും ഉയർന്നു വരുന്നു. 5ജി വരുന്നതോടെ ക്യാൻസർ ഉണ്ടാകാനുള്ള സാധ്യത കൂടുമെന്ന പ്രചരണം പോലും ഇതിൽ ഉൾപ്പെടുന്നു. ഈ വിഷയവുമായി ബന്ധപ്പെട്ട് നിരവധി ചർച്ചകൾ നേരത്തെയും നടന്നിട്ടുള്ളതാണ്. നമ്മുടെയെല്ലാം നിത്യജീവിതത്തിൽ ഫോണുകൾ ഒഴിച്ച് കൂടാനാകാത്ത ഒന്നായി മാറിയിട്ടുണ്ട്. അതുകൊണ്ട് തന്നെ 5ജി ക്യാൻസറിന് കാരണാകുമോ എന്ന പഠനങ്ങളും വളരെ പ്രാധാന്യത്തോടെ കാണേണ്ടതുണ്ട്.

ക്യാൻസറും മൊബൈൽ ഫോൺ ഉപയോഗവും തമ്മിൽ എന്തെങ്കിലും ബന്ധമുണ്ടോ എന്ന കാര്യം ഗവേഷകർ ഗൗരവമായി പഠിക്കുന്നുണ്ട്. ഇതിനൊപ്പം തന്നെ ആളുകൾ എന്തുകൊണ്ടാണ് ക്യാൻസറിനെ മൊബൈൽ ഫോൺ ഉപയോഗവുമായി ബന്ധപ്പെടുത്തുന്നത് എന്നത് സംബന്ധിച്ചും പഠനങ്ങൾ നടക്കുന്നുണ്ട്. അമേരിക്കയിലെ നാഷണൽ ക്യാൻസർ ഇൻസ്റ്റിറ്റ്യൂട്ട് പറയുന്നത്, ആളുകൾ ക്യാൻസറിനെയും മൊബൈൽ ഫോൺ ഉപയോഗത്തെയും ബന്ധിപ്പിച്ച് ചിന്തിക്കുന്നത്, മൊബൈൽഫോൺ റേഡിയോ ഫ്രീക്വൻസി ഉപയോഗിക്കുന്നത് കൊണ്ടാണെന്നാണ്.

ആളുകൾ കരുതുന്നത് തലച്ചോറും കേന്ദ്ര നാഡീവ്യൂഹവും അവയുമായി ബന്ധപ്പെട്ട ക്യാൻസറും മൊബൈൽ ഫോൺ ഉപയോഗിക്കുന്നതിലൂടെയാണ് വർധിക്കുന്നത് എന്നാണ്. ഫോണുകൾ തലയോട് ചേർന്ന് പിടിച്ചിരിക്കുന്നതാണ് ഇതിന് കാരണമെന്നും വിശ്വസിക്കുന്നവരുണ്ട്. മറ്റൊരു കാരണമായി ആളുകൾ മുന്നോട്ട് വയ്ക്കുന്നത് അയോണൈസിങ് റേഡിയേഷനാണ്, ഇത് ചില മസ്തിഷ്ക ക്യാൻസറുകൾക്ക് കാരണമാകുമെന്ന് കണ്ടെത്തിയിട്ടുമുണ്ട്. എന്നിരുന്നാലും സെൽഫോണുകൾക്ക് ഇത്രയും മാരകമായ അയോണൈസിങ് റേഡിയേഷൻ പുറത്ത് വിടാൻ സാധിക്കില്ല.

ഇലക്ട്രോമാഗ്നറ്റിക്ക് സ്പെക്ട്രത്തിന്റെ റേഡിയോ ഫ്രീക്വൻസി മേഖലയിൽ സെൽ ഫോണുകൾ റേഡിയേഷൻ പുറപ്പെടുവിക്കുന്നതായി കണ്ടെത്തിയിട്ടുണ്ട്. 2ജി, 3ജി, 4ജി എന്നിവയിൽ പ്രവർത്തിക്കുന്ന ഫോണുകൾ 0.7 മുതൽ 2.7 GHz ഫ്രീക്വൻസി റേഞ്ചിലാണ് റേഡിയോ ഫ്രീക്വൻസി പുറപ്പെടുവിക്കുന്നത്. എന്നാൽ 5ജി സെൽ ഫോണുകൾ 80 GHz വരെ ഫ്രീക്വൻസി സ്പെക്ട്രം ഉപയോഗിച്ചേക്കും. എന്തായാലും 5ജി നെറ്റ്‌വർക്കിൽ പോലും മുകളിൽ സൂചിപ്പിച്ച രീതിയിലുള്ള അപകടകാരിയായ അയോണൈസിങ് റേഡിയേഷൻ പുറപ്പെടുവിക്കുന്നില്ല.

2ജി മുതൽ 5ജി വരെയുള്ളവയുടെ ഫ്രീക്വൻസി റേഞ്ചുകളിലെല്ലാം കുറഞ്ഞ ഫ്രീക്വൻസിയും കുറഞ്ഞ എനർജിയുമാണ് ഉപയോഗിക്കുന്നത്. മനുഷ്യരുടെ ഡിഎൻഎയ്ക്ക് എന്തെങ്കിലും കേടുപാടുകൾ വരുത്താൻ ഇതിന് സാധിക്കുകയില്ല. എക്സ്-റേ, റഡോൺ, കോസ്മിക് റേയ്സ് എന്നിവയിൽ നിന്നും പുറത്തുവിടുന്ന അയോണൈസിങ് റേഡിയേഷനുമായി താരതമ്യം ചെയ്യുമ്പോൾ 5ജിയുടെ റേഡിയേഷൻ വളരെ കുറഞ്ഞതാണ്. എന്നാൽ ഇവയിലൂടെ പുറത്ത് വിടുന്ന റേഡിയേഷൻ ഡിഎൻഎയെ തകരാറിലാക്കാൻ സാധിക്കുന്ന വിധത്തിലുള്ളതാണ്.

നാഷണൽ ക്യാൻസർ ഇൻസ്റ്റിറ്റ്യൂട്ട് കോഹോർട്ട് സ്റ്റഡീസ്, കേസ് കൺട്രോൾ സ്റ്റഡീസ് എന്നിങ്ങനെ രണ്ട് വിധത്തിലുള്ള എപ്പിഡെമിയോളജിക്കൽ പഠനങ്ങൾ നടത്തിയിട്ടുണ്ട്. ഈ പഠനങ്ങളിൽ നിന്നും മനസിലാകുന്നത് സെൽ ഫോൺ ഉപയോഗം മനുഷ്യരുടെ തലച്ചോറിനെ ബാധിക്കുകയോ ക്യാൻസറിന് കാരണമാവുകയോ ചെയ്യില്ല എന്നതാണ്. സെൽ ഫോൺ ഉപയോഗം മൂലം യാതൊരു തരത്തിലുള്ള ക്യാൻസറും ഉണ്ടാകില്ലെന്നും ഗവേഷകർ കണ്ടെത്തി. സെൽഫോൺ ഉപയോഗം ക്യാൻസറിന് കാരണമാകില്ലെന്ന് യുകെയിലെ ക്യാൻസർ റിസർച്ചും വ്യക്തമാക്കിയതാണ്.