ഗർഭാരംഭകാലത്തെ ഛർദ്ദി പരിഹരിക്കാൻ ചില വിദ്യകൾ..

എല്ലാ പെൺകുട്ടികൾക്കും തൻ്റെ ജീവിതത്തിലേക്ക് പുതിയ ഒരാളെ വരവേൽക്കുന്നതിനുള്ള ആ കാത്തിരിപ്പിൽ അവളുടെ ശരീരത്തിനും മനസ്സിനും പ്രതീക്ഷിക്കാനാവാത്ത മാറ്റങ്ങളുണ്ടാകുന്നുണ്ട്. വയറ്റിലുണ്ടാകുന്ന കുഞ്ഞിൻ്റെ ആദ്യ അനക്കം മുതൽ 10 മാസക്കാലയളവിനുള്ളിൽ കുഞ്ഞു പുറത്തുവരുന്നത് വരെയുള്ള ഓരോ ചെറിയ കാര്യങ്ങൾ പോലും അമ്മമാർ സന്തോഷത്തോടെയും അതീവ ജാഗ്രതയോടെയും ഉറ്റുനോക്കുന്നുണ്ടാവും.

ഓരോ സ്ത്രീകളുടേയും ശരീരത്തിൽ ഗർഭകാല ദിനങ്ങളോടനുബന്ധിച്ച് ഉണ്ടാകുന്ന മാറ്റങ്ങളിൽ ചിലത് അവർക്ക് അസ്വസ്ഥതകളും ബുദ്ധിമുട്ടുകളുമൊക്കെ സമ്മാനിക്കുന്നുണ്ട്. അതിലൊന്നാണ് മോർണിംഗ് സിക്ക്നസ്സിൻ്റെ പ്രശ്നങ്ങൾ. പ്രത്യേകിച്ചും ആദ്യ ത്രിമാസത്തിൽ ഉണ്ടാകാൻ സാധ്യതയുള്ള ഒരുപ്രധാന പ്രശ്നമാണ് മോണിംഗ് സിക്നസ്. ഓക്കാനം, നേരിയ തലവേദന, തലകറക്കം, ഛർദ്ദി, ഓക്കാനം, മനംപിരട്ടൽ തുടങ്ങിയ ലക്ഷണങ്ങളോട് കൂടിയാണ് ഇത് പ്രകടമാവുന്നത്.

ഗർഭാവസ്ഥയുടെ നാലാം ആഴ്ച മുതൽ പതിനാറാം ആഴ്ചകൾ വരേയാണ് സാധാരണയായി മോണിംഗ് സിക്നസ് ലക്ഷണങ്ങൾ കൂടുതലായി അനുഭവപ്പെടുന്നതെന്ന് കണ്ടെത്തിയിരിക്കുന്നു. ഇവ ഉണ്ടാകുന്നതിൻ്റെ കൃത്യമായ കാരണം വ്യക്തമല്ലെങ്കിലും ഗർഭകാല നാളുകളിൽ ഹോർമോണുകളിൽ ഉണ്ടാവുന്ന ചെറിയ വ്യതിയാനങ്ങൾ ഇതിൻ്റെയൊരു കാരണമാണെന്ന് ചില ഗവേഷകർ ചൂണ്ടിക്കാട്ടുന്നു. മോണിംഗ് സിക്നസിൻ്റെ ബുദ്ധിമുട്ടുകളെ ഒഴിവാക്കാനായി കൃത്യമായ ചികിത്സകൾ ഒന്നും ആവശ്യമില്ല. എങ്കിലും ഇതിൻ്റെ സാധ്യതകളെ കുറച്ചുകൊണ്ട് ലക്ഷണങ്ങളെ കൈകാര്യം ചെയ്യാൻ സഹായിക്കുന്ന ഉപയോഗപ്രദമായ ചില മാർഗങ്ങൾ നിങ്ങളുടെ കയ്യിൽ തന്നെയുണ്ട്. ചില നുറുങ്ങ് വിദ്യകൾ ഇതാ,

മോർണിംഗ് സിക്ക്നെസ്സ് തടയാൻ ഏറ്റവും നല്ല പ്രതിവിധി ധാരാളം വെള്ളം കുടിക്കുക എന്നത് തന്നെയാണ്. ഗർഭിണിയായ ഒരു സ്ത്രീയുടെ ശരീരത്തിൽ ആവശ്യമായ ജലാംശം ഇല്ലാതെ വരുമ്പോൾ ഇത് ഓക്കാനം, ഛർദ്ദി എന്നീ ലക്ഷണങ്ങൾ ഉണ്ടാകാൻ കാരണമാകാറുണ്ട്. മോണിംഗ് സിക്നസ് ഉണ്ടാവുന്നതിനെ ഒരു പ്രധാന കാരണമാണ് ശരീരത്തിൽ നിർജലീകരണം സംഭവിക്കുന്നത്. അതിനാൽ, സ്വയം ജലാംശം ഉള്ളവരായി നിലനിർത്തേണ്ടത് അത്യാവശ്യമാണ്. ഗർഭിണിയായ ഒരു സ്ത്രീ ഒരു ദിവസം കുറഞ്ഞത് ആറ് മുതൽ എട്ട് ഗ്ലാസ് വെള്ളം വരെ കുടിച്ചിരിക്കണം. അതോടൊപ്പം ദിവസത്തിൽ ഉടനീളം നിങ്ങൾക്ക് ഹെർബൽ ടീ, ശീതള പാനീയങ്ങൾ, എന്നിവയും പരിഗണിക്കാം. ഈ നല്ല ശീലം നിങ്ങളുടെ മോണിംഗ് സിക്നസ് പ്രശ്നങ്ങളെ തുടക്കത്തിൽ തന്നെ കുറയ്ക്കാൻ സഹായിക്കും.

ഗർഭാവസ്ഥയിലുള്ള സ്ത്രീകൾ പോഷകാഹാരത്തിന്റെ കാര്യം പ്രത്യേകം കണക്കിലെടുത്തുകൊണ്ട് വേണം ഭക്ഷണക്രമം പിന്തുടരാൻ. ഇതിനായി ഓരോ ദിവസവും സാധാരണയിൽ നിന്നും വിപരീതമായി ആറ് നേരത്തെ ഭക്ഷ്യ പദ്ധതി പിന്തുടരാൻ ശുപാർശ ചെയ്യുന്നു. ഇടയ്ക്കിടെ ചെറിയ അളവിൽ ഭക്ഷണം കഴിക്കുന്ന ശീലം വളർത്തിയെടുക്കുന്നത് വഴി ഈ കാലയളവിൽ ശരീരഭാരം വർദ്ധിക്കുന്ന ലക്ഷണങ്ങളെ തടയാൻ സഹായിക്കും. ഇതിനായി പ്രോട്ടീൻ നിറഞ്ഞ ലഘുഭക്ഷണങ്ങൾ കൂടുതലായി തിരഞ്ഞെടുക്കുക. ഈയൊരു രീതി പിന്തുടരുന്നത് ദഹനത്തെ മികച്ചതാക്കി മാറ്റുകയും ചെയ്യുന്നു. ഓക്കാനം, ഗ്യാസ് ട്രബിൾ എന്നിവയെ പ്രതിരോധിക്കാനും ഈ രീതി മികച്ചതാണ്.

പല തരം ആസക്തികൾ ഗർഭകാലത്ത് ഉണ്ടാകുന്നത് സ്വാഭാവികമാണ്. ഗർഭകാല നാളുകളിൽ പച്ചമാങ്ങയിൽ തുടങ്ങി ഐസ്ക്രീം വരെ കഴിക്കാനുള്ള തോന്നലുകൾ ഉണ്ടാകാനുള്ള സാധ്യതയുണ്ട്. ഗർഭാവസ്ഥയുടെ ദിനങ്ങളിൽ ഒട്ടുമിക്ക അമ്മമാർക്കും മധുരത്തോടും മധുരപലഹാരങ്ങളോടുമെല്ലാം ആസക്തി വർദ്ധിക്കുന്നത് കാണാറില്ലേ? സത്യത്തിൽ മധുരം കഴിക്കുന്ന ശീലം ഗർഭകാല നാളുകളിൽ നിയന്ത്രിച്ചു നടത്തേണ്ട ഒരു കാര്യമാണ്. മധുരം അധികമാകുമ്പോഴും, നിങ്ങൾക്ക് ആവശ്യമുള്ളതിനേക്കാൾ കൂടുതൽ കലോറി വയറ്റിനുള്ളിൽ ചെല്ലുമ്പോഴുമെല്ലാം ഓക്കാനം, അലസത, മാനസികസ്വാസ്ഥ്യം തുടങ്ങിയ ലക്ഷണങ്ങൾ ഉണ്ടാവുന്നതിന് കാരണമാകുന്നു. ഗർഭകാല പ്രമേഹം ഒഴിവാക്കാനും മധുരം കഴിക്കുന്ന ശീലം ഒഴിവാക്കുന്നതായിരിക്കും നല്ലത്.

ധാരാളം പോഷകങ്ങൾ അടങ്ങിയ ഭക്ഷണക്രമം പിന്തുടരേണ്ട സമയമാണിത് എന്ന് എല്ലാവർക്കും അറിയാം. അമ്മയുടെയും കുഞ്ഞിന്റെയും ആരോഗ്യത്തിന് പ്രധാനമാണ് ഇത്. കൂടുതൽ വിറ്റാമിനുകൾ അടങ്ങിയ ഭക്ഷണം കഴിക്കാൻ ശ്രദ്ധിക്കുക. വിറ്റാമിനുകൾ ധാരാളം അടങ്ങിയ ഭക്ഷണം കഴിക്കുന്നത് മോർണിംഗ് സിക്ക്നെസ്സ് പ്രശ്നങ്ങളെ അകറ്റി നിർത്താൻ സഹായിക്കും. ഗവേഷണമനുസരിച്ച്, വിറ്റാമിൻ ബി 6 പോലുള്ള കോർ സപ്ലിമെന്റുകൾ ഏറ്റവും കൂടുതലായി ശരീരത്തിന് ആവശ്യമുള്ള സമയമാണ് ഗർഭകാലം. അമ്മയേയും കുഞ്ഞിനെയും ആരോഗ്യത്തിന് ഉപകരിക്കുന്നു എന്നതിലുപരി ഇവയുടെ അവിശ്വസനീയമായ മറ്റൊരു ഗുണം ഇത് മോണിംഗ് സിക്നസ്സ് ലക്ഷണങ്ങളെ പരമാവധി ചെറുത്തു നിർത്താൻ സഹായിക്കുന്നു എന്നതാണ്. ഇതു മാത്രമല്ല മറ്റ് വിറ്റാമിനുകളും നിങ്ങളുടെ ആരോഗ്യത്തിന് ഫലപ്രദമാണ്. അതിനാൽ വിറ്റാമിൻ സപ്ലിമെന്റുകളും വിറ്റാമിൻ അടങ്ങിയ ഭക്ഷണവും ഉടൻ തന്നെ ഭക്ഷണത്തിൽ ചേർക്കുക.

ഗർഭിണിയായാൽ പലരും വ്യായാമംങ്ങളിൽ നിന്ന് വിട്ടു നിൽക്കുന്ന ശീലമാണ് കണ്ടുവരുന്നത്. ഗർഭകാലം വ്യായാമരഹിത കാലമാണെന്ന് കരുതുന്നത് തെറ്റായ ധാരണയാണ്. ഈ സമയത്തെ വ്യായാമവും യോഗയുമൊക്കെ ഗർഭിണിക്കുണ്ടാകുന്ന പല ശാരീരിക അസ്വസ്ഥതകളിൽ നിന്നും രക്ഷ നേടാൻ സഹായിക്കുന്ന ഒന്നാണ്. കൂടാതെ സുഖപ്രസവത്തിനും ഗർഭകാലത്തെ യോഗ സഹായിക്കുന്നു. ഗർഭിണിയായ ഒരു സ്ത്രീയുടെ ശരീരത്തെ ശാന്തമാക്കാനും അവയവങ്ങൾക്ക് ചുറ്റുമുള്ള രക്തയോട്ടം മെച്ചപ്പെടുത്താനും പ്രസവാനന്തര യോഗ സഹായിക്കും. ഇത് മനസ്സിനും ശരീരത്തിനും ശാന്തത നൽകുന്നു. മോണിംഗ് സിക്നസ് അടക്കമുള്ള നിങ്ങളുടെ അസ്വസ്ഥതയുടെ ലക്ഷണങ്ങളെ മുഴുവൻ ലഘൂകരിച്ചുകൊണ്ട് ഉന്മേഷം വർദ്ധിപ്പിക്കാൻ ഇത് സഹായിക്കും. നിങ്ങളുടെ ദിവസം തുടങ്ങുന്നത് തന്നെ 10-15 മിനിറ്റ് ദൈർഘ്യമുള്ള യോഗ പരിശീലനത്തോടെ ആയിരിക്കട്ടെ.