ഹോം ക്വാറന്റ്റൈനിൽ കഴിയുന്ന കോവിഡ് രോഗികൾക്ക് ഭക്ഷണം നൽകേണ്ടത് എങ്ങനെയാണ്?

രാജ്യത്തായാലും സംസ്ഥാനത്തായാലും കോവിഡ് രോഗബാധിതരുടെ എണ്ണം ദിനംപ്രതി ഉയർന്നുവരുന്ന സാഹചര്യമാണ്. രോഗബാധിതരുടെ അളവിൽ കവിഞ്ഞ വർദ്ധനവ് മൂലം ഇന്ന് ആശുപത്രികളിൽ പോലും രോഗികളെ പ്രവേശിപ്പിക്കാൻ തക്കതായ സൗകര്യങ്ങളില്ല എന്നു വേണം പറയാൻ. അതുകൊണ്ടുതന്നെ നേരിയ ലക്ഷണങ്ങളോടെ രോഗം ബാധിച്ചവരെല്ലാവരും ഇപ്പോൾ അവരുടെ വീട്ടിൽ തന്നെ സ്വയം പ്രതിരോധത്തിനായി ഹോം ക്വാറൻ്റനിലും സെൽഫ് ഐസൊലേഷനിലുമൊക്കെ കഴിയുന്ന സാഹചര്യമാണുള്ളത്.

ലോകാരോഗ്യ സംഘടനയുടെ നിർദ്ദേശമനുസരിച്ച് കൊവിഡ്-19 പോസിറ്റിവ് ആയ ഒരാൾ വായുസഞ്ചാരമുള്ള ഒരു ഒറ്റ മുറിയിൽ ഹോം ഐസൊലേഷനിൽ കഴിയണം എന്നാണ് നിർദേശിക്കപ്പെടുന്നത്. യാതൊരു കാരണവശാലും വീട്ടിലെ മറ്റുള്ളവർ രോഗിയുമായി അടുത്ത സമ്പർക്കം പുലർത്തുകയോ രോഗിയുടെ മുറി ഉപയോഗിക്കുകയോ ചെയ്യുന്നത് കഴിവതും ഒഴിവാക്കുകയും വേണം.

ജനിതക മാറ്റം സംഭവിച്ച പുതിയ കൊറോണ വൈറസ് വളരെ വേഗത്തിൽ പടർന്നു പിടിക്കുന്നതും, ഒരു വ്യക്തിയെ പ്രതീക്ഷിക്കുന്നതിനേക്കാൾ പെട്ടെന്ന് സങ്കീർണമായ അവസ്ഥകളിലേക്ക് നയിക്കുകയും ചെയ്യുന്നതാണെന്നത് ഈ ദിനങ്ങളിലെ ഏറ്റവും ഭയാനകമായ വസ്തുതയാണ്. ശ്വസിക്കുമ്പോഴും സംസാരിക്കുമ്പോഴുമെല്ലാം രോഗബാധിതനായ ഒരാൾ പുറപ്പെടുവിക്കുന്ന ഉമിനീർ കണികകളാണ് വൈറസ് വ്യാപനത്തിന്റെ ഏറ്റവും ശക്തമായ ഉറവിടമായി മാറാൻ സാധ്യതയുള്ളത് എന്ന് ശാസ്ത്രം ചൂണ്ടിക്കാണിക്കുന്നു. വായുസഞ്ചാരം കുറഞ്ഞ ഇടങ്ങളാണ് രോഗി ഉപയോഗിക്കുന്നതെങ്കിൽ ഇവിടെ കൂടുതൽ സമയം വായു തങ്ങിനിൽക്കുകയും അതുവഴി വൈറസ് പടരാനുള്ള സാധ്യത വർദ്ധിക്കുകയും ചെയ്യുമെന്നും പറയപ്പെടുന്നുണ്ട്.

വീട്ടിലെ ഒരു വ്യക്തിക്കോ കുടുംബാംഗത്തിനോ കൊവിഡ് പോസിറ്റീവ് ആണെന്ന് പരിശോധിച്ചിറഞ്ഞാൽ രോഗിയെ സംരക്ഷിക്കുന്നതിനും മറ്റുള്ളവർക്ക് രോഗം പകരാതിരിക്കാനുള്ള പ്രതിരോധത്തിനുമായി സുഖം പ്രാപിക്കുന്നത് വരെ രോഗിയെ ഒരു മുറിയിൽ ഐസൊലേഷനിൽ കഴിയാൻ അനുവദിക്കുകയാണ് ആദ്യം ചെയ്യേണ്ട കാര്യം. രോഗം വേഗത്തിൽ ഭേദപ്പെടുന്നതിനായി രോഗിയുടെ പോഷക ആവശ്യകതകളെല്ലാം കൃത്യമായി നിറവേറ്റേണ്ടതാണ് രണ്ടാമത്തെ പ്രധാന കാര്യം. എന്നാൽ ഇക്കാര്യം വരുമ്പോൾ രോഗിക്ക് ആവശ്യമായ ഭക്ഷണങ്ങളും മറ്റും നൽകേണ്ടി വരുന്ന സാഹചര്യത്തിൽ ശ്രദ്ധിക്കേണ്ട പല കാര്യങ്ങളുമുണ്ട്. കാരണം രോഗിയുമായുള്ള ഒരു ചെറിയ സമ്പർക്കം പോലും ചിലപ്പോൾ വീട്ടിലുള്ള മറ്റുള്ളവർക്ക് രോഗം പകരാനുള്ള സാധ്യതയ്ക്ക് വഴിയൊരുക്കിയേക്കാം.

ഒരു മുറിയിൽ ഒറ്റപ്പെട്ട് ഐസൊലേഷനിൽ കഴയുന്ന ഒരു കോവിഡ് രോഗിക്ക് ഭക്ഷണം എത്തിക്കുന്ന കാര്യം ഏറ്റവും സുരക്ഷിതമായ നടപടികളിലൂടെ ആവണം ചെയ്തു തീർക്കേണ്ടത്. ഇക്കാര്യത്തിൽ അത് എങ്ങനെ ചെയ്യണമെന്ന് പലർക്കും ആശയക്കുഴപ്പം ഉണ്ടാകാനുള്ള സാധ്യതയുണ്ട്. വീട്ടിൽ ക്വാറൻ്റെനിൽ കഴിയുന്ന ഒരു കുടുംബാംഗത്തിന് ഭക്ഷണം നൽകുമ്പോൾ ശ്രദ്ധിക്കേണ്ട ചില കാര്യങ്ങളും നടപടികളും എന്തൊക്കെയാണെന്ന് നോക്കാം.

1.ഒന്നാമതായി, കൊറോണ വൈറസ് ബാധിച്ച ഒരു രോഗിക്കായി പ്രത്യേകം കപ്പുകളും, പാത്രങ്ങളും ഉപയോഗിക്കണം. രോഗമുള്ളവർ ഉപയോഗിച്ചത് യാതൊരു കാരണവശാലും മറ്റുള്ളവർ ഉപയോഗിക്കാനോ കൈമാറാനോ പാടുള്ളതല്ല.

2.വസ്തുവകകൾ കൈമാറുന്നതിനായി രോഗിയുടെ മുറിക്ക് മുന്നിലായി ഒരു മേശ വയ്ക്കുക. ഒരു N95 മാസ്ക് ധരിച്ചുകൊണ്ട് ഭക്ഷണം പുറത്തെ മേശപ്പുറത്ത് കൊണ്ടുവന്ന് വയ്ക്കുക. ഭക്ഷണം വച്ചുകഴിഞ്ഞാൽ ഇത് രോഗിയെ അറിയിക്കുക.

3.N95 മാസ്ക് ധരിച്ച രോഗി വാതിൽ തുറന്ന് ആവശ്യമുള്ളതെല്ലാം എടുത്തു ഉടനെ വാതിൽ അടയ്ക്കുകയും വേണം. കഴിയുമെങ്കിൽ ഉപയോഗിച്ച പാത്രങ്ങളെല്ലാം മുറിക്ക് പുറത്തുള്ള മേശപ്പുറത്ത് തിരികേ വയ്ക്കുന്നതിന് മുമ്പ് ആ രോഗിയോട് തന്നെ കഴുകി വൃത്തിയാക്കാൻ ആവശ്യപ്പെടുക.

4.അതിനു ശേഷം പാത്രങ്ങളെല്ലാം അവിടെ നിന്ന് നീക്കം ചെയ്ത് ചൂടുള്ള സോപ്പ് വെള്ളത്തിൽ മുക്കിവച്ച് നന്നായി കഴുകണം. സോപ്പും വെള്ളവും ഉപയോഗിച്ചുകൊണ്ട് ഇത് കൈകാര്യം ചെയ്യുന്ന ആളുടെ കൈകളും നന്നായി കഴുകാൻ മറക്കരുത്.

ഇവയോടൊപ്പം തന്നെ രോഗബാധിതരായ വ്യക്തികൾ ഉള്ള വീട്ടിൽ ഉറങ്ങുമ്പോൾ ഒഴികെ കുടുംബത്തിലെ മറ്റ് അംഗങ്ങളെല്ലാം N95 മാസ്ക് ധരിക്കേണ്ടത് ഏറ്റവും പ്രധാനമാണെന്ന കാര്യം ഓർമയിൽ വയ്ക്കേണ്ടതാണ്. എങ്കിൽ മാത്രമേ രോഗബാധിതനിൽ നിന്നും ഈ രോഗം വീട്ടിലെ മറ്റുള്ളവർക്ക് പകരാതിരിക്കുകയുള്ളു. ഈ രോഗം ഭൂമിയിൽ നിന്ന് എന്നെന്നേക്കുമായി തുടച്ച് നീക്കണമെങ്കിൽ ആരോഗ്യ വകുപ്പിന്റെ ഇത്തരം നിർദേശങ്ങൾ പാലിച്ചേ മതിയാകൂ.