ഓക്സിമീറ്ററിലെ വ്യാജനെ എങ്ങനെ കണ്ടെത്താം?
- Alfa MediCare
- Sep 28, 2021
- 1 min read
ഓക്സിമീററര് കൊവിഡ് കാലത്ത് അത്യാവശ്യമായ ഒന്നാണ്. രക്തത്തിലെ ഓക്സിജന് തോത് കണ്ടെത്താന് സാധിയ്ക്കുന്ന ഒന്ന്. രക്തത്തിലെ ഓക്സിജന് തോത് 94ല് കുറഞ്ഞാല് ശ്രദ്ധ വേണം. കാരണം ശരീരത്തിലെ അവയവങ്ങള്ക്ക് ആവശ്യത്തിന് ഓക്സിജന് ലഭിയ്ക്കുന്നില്ലെന്ന അവസ്ഥയാണ് ഇത് കാണിയ്ക്കുന്നത്. ഇതിന് സഹായിക്കുന്ന ഉപകരണമാണ് ഓക്സിമീറ്റര്. എന്നാല് ആവശ്യം കൂടുന്തോറും ഇതിന് വ്യാജന്മാരും കൂടുതലാണ്. ഇതിന്റെ വ്യാജനെ തിരിച്ചറിയാന് നമുക്ക് പലപ്പോഴും സാധിയ്ക്കാതെ വരുന്നു. പ്രത്യേകിച്ചും സാധാരണ ജനങ്ങള്ക്ക്. അതിനാൽ ഓക്സിമീറ്റര് മെഡിക്കല് പ്രൊഫഷണലിനെ കാണിച്ച് വാങ്ങുകയെന്നതാണ് ഏറ്റവും നല്ലത്. എന്നാല് ഇന്നത്തെ സാഹചര്യത്തില് ഇത് സാധ്യമാകില്ല.
ഓക്സിമിറ്ററില് രണ്ടു ലൈറ്റുകള് കാണാം. ഇതില് ചുവന്ന നിറത്തിലെ ലൈറ്റുണ്ട്. ഈ ലൈറ്റ് രക്തക്കുഴലിലെ ഓക്സിജന് അളവ് കുറഞ്ഞ രക്തകോശം വലിച്ചെടുക്കുന്നു. മറ്റേ ലൈറ്റ് ഓക്സിജന് അളവ് കൂടുതലുള്ള രക്തകോശങ്ങള് വലിച്ചെടുക്കുന്നു. വലിച്ചെടുത്ത ശേഷം ബാക്കി എത്ര വരുന്നുവെന്നത് ഇതിലെ സെന്സര് കണ്ടെത്തി ഇതാണ് അളവായി കാണിക്കുന്നത്.
കൈപ്പത്തിയിലേയ്ക്ക് രണ്ട് ആര്ട്ടറികളാണ് രക്തം കൊണ്ടു വരുന്നത്. ഏറ്റവും കൂടുതല് രക്തം വരുന്നത് നടുവിരലിലാണ്. ഇതിനാലാണ് നടുവിരലില് ഓക്സിമീറ്റര് വച്ചു നോക്കുന്നതാണ് നല്ലത് എന്നു പറയുന്നത്. കയ്യിലെ രണ്ട് ആര്ട്ടറികളേയും നാം ബ്ലോക്ക് ചെയ്തു പിടിച്ചാല് ഓക്സിജന് അളവും പള്സ് അളവും കാണിക്കില്ല. ഇതിനായി കൈത്തണ്ടയിലെ രണ്ട് ആര്ട്ടറികളും ഉള്പ്പെടെ കൈ വട്ടത്തില് മറ്റേ കൈ കൊണ്ടു ചുറ്റിപ്പിടിച്ച് അമര്ത്തി ബ്ലോക്ക് ചെയ്തു പിടിക്കുക. പിന്നീട് നടുവിരലില് ഓക്സിമീററര് പിടിപ്പിയ്ക്കുക. അപ്പോള് നല്ല ഓക്സിമീറ്ററെങ്കില് പള്സോ ഓക്സിജനോ കാണിക്കില്ല. വെറും ലൈന് മാത്രം കാണാം.
കാരണം നാം കൈത്തണ്ടയില് അമര്ത്തിപ്പിടിച്ച് ആര്ട്ടറികള് ബ്ലോക്ക് ആക്കിയതിനാല് തന്നെ പള്സും ഓക്സിജനുമെല്ലാം തടസപ്പെടുന്നു. ഇത് പീന്നീട് അയച്ച് സാധാരണ നിലയിലാക്കി ഓക്സിമീറ്റര് നോക്കുക. അപ്പോള് ഇത് സാധാരണ രീതിയിലെ പള്സ്, ഓക്സിജന് കാണിക്കും. എന്നാല് നല്ലതല്ലാത്ത ഓക്സിമീറ്ററെങ്കില് എപ്പോഴും വാല്യൂ കാണിയ്ക്കും. ഒരിക്കലും അളവ് കാണിക്കാത്തതെങ്കില് ഇത് ഡ്യൂപ്ലിക്കേറ്റാണെന്ന് പെട്ടെന്നു തിരിച്ചറിയാം.
ഓക്സിമീറ്റര് കൃത്യമായി ഉപയോഗിയ്ക്കാനും അറിയണം. ഏറ്റവും നല്ലത് നടുവിരലാണ്. വിയര്ത്തു നില്ക്കുന്ന അവസ്ഥയില് ഇത് ഉപയോഗിയ്ക്കരുത്. വിശ്രമാവസ്ഥയില് വേണം, ഇത് പരിശോധിയ്ക്കാന്. ഇതു പോലെ നഖത്തില് നെയില് പോളിഷോ മയിലാഞ്ചിയോ മറ്റ് കോട്ടിംഗുകളോ ഉണ്ടാകരുത്. ഓക്സി മീറ്റര് വച്ചു നോക്കുമ്പോള് 94ല് കുറവെങ്കില് അല്പനേരം കഴിഞ്ഞ ശേഷം വീണ്ടും നോക്കാം. അല്ലെങ്കില് മുറിയില് 6 മിനിറ്റ് നടക്കുക. വീണ്ടും നോക്കുക. എന്നിട്ടും അളവ് ഉയരുന്നില്ലെങ്കില് ഇത് ശ്രദ്ധ വേണ്ടതാണ്. ഇതു പോലെ ബ്രീത്തിംഗ് വ്യായാമങ്ങള് ചെയ്തും പരീക്ഷിയ്ക്കാം.
കൊവിഡ് പരന്നതോടെ ഓക്സിമീറ്ററിന് ഡിമാന്റ് കൂടി. അത്കൊണ്ട് തന്നെ കാപട്യത്തിന്റെ വിപണിയിൽ വീഴാതെ എപ്പോഴും നല്ലത് മാത്രം തിരഞ്ഞെടുക്കാൻ ശ്രദ്ധിക്കുക.
Comments