നമ്മുടെ ചിന്തകളെ പോസിറ്റീവ് ആക്കാം!

ജീവിതം ഒഴിവാക്കാനാവാത്ത ഒരുകൂട്ടം അനുഭവങ്ങളുടെ നീണ്ട നിരയാണന്നതില്‍ സംശയമില്ല. അതില്‍ നല്ലതും ചീത്തയും ഉണ്ടാവാം. സന്തോഷിപ്പിക്കുന്നതും ദുഖിപ്പിക്കുന്നതും ഉണ്ടാവാം. പ്രതിബന്ധങ്ങളെ ദുഖങ്ങളായാണ് പലപ്പോഴും നമ്മൾ കാണുക. എന്നാല്‍ പ്രതിബന്ധങ്ങൾ നമ്മളെ കൂടുതല്‍ കരുത്തരാക്കുകയാണ് ചെയ്യുന്നത്. അതില്‍ നിന്നും കരകയറിയപ്പോൾ നമ്മൾ ഉൾക്കൊണ്ട പാഠങ്ങൾ എത്രയോ വലുതാണ്.

നമ്മുടെ ചിന്തകളെ പോസിറ്റീവ് ആക്കാം!

നമ്മുടെ ജീവിതത്തില്‍ നമ്മുടെ ആഗ്രഹങ്ങൾക്ക് വിപരീതമായി നടക്കുന്ന സംഭവങ്ങൾ മറ്റാരെങ്കിലും കാരണം സംഭവിച്ചതാണ് എന്ന് കരുതുന്നുണ്ടെങ്കില്‍ ആ ചിന്ത മാറ്റേണ്ട സമയം അതിക്രമിച്ചിരിക്കുന്നു. കാരണഹേതു ആരായാലും എന്തായാലും അതില്‍ നിന്ന് പാഠമുൾക്കൊണ്ട് നിങ്ങൾക്ക് വളരാനായി എന്നതിന്‍റെ തെളിവാണ് നിങ്ങളതിനെ മറികടന്നു എന്നത്.

നെഗറ്റീവ് ആയ ഓര്‍മകളെ ദീര്‍ഘനേരം പിടിച്ചു നിര്‍ത്തി, പോസിറ്റീവ് ആയവയെ എളുപ്പത്തില്‍ വിട്ടുകളയുന്നത് തികച്ചും മനുഷ്യസഹജമാണ്. അതിനെ മറികടക്കാൻ ബോധപൂര്‍വമായുള്ള പരിശ്രമം ആവശ്യമാണ്. പ്രതിസന്ധികളും തിരിച്ചടികളും ഉണ്ടാകുമ്പോൾ അവയെ കാലാകാലം മനസ്സില്‍ കൊണ്ടു നടന്ന് സ്വയം സഹതപിക്കുന്നതിന് പകരം അവയെ മറികടക്കുകയാണ് വേണ്ടത്. ഇത്തരം സമയങ്ങളില്‍ ചുറ്റുപാടുമുള്ള പോസിറ്റീവുകൾ ഒന്നും നമ്മൾ കണ്ടില്ലെന്ന് വരാം. എന്നാല്‍ അതിനര്‍ത്ഥം പോസിറ്റീവായി ഒന്നും സംഭവിക്കുന്നില്ല എന്നല്ല. അത് നമ്മൾ കാണുന്നില്ല എന്നാണ്. അവയെക്കൂടി കാണാൻ മനസ്സിനെ പാകപ്പെടുത്തുകയാണ് വേണ്ടത്.

കഴിഞ്ഞുപോയ സംഭവത്തെക്കുറിച്ച് ഓ‍ര്‍ത്ത് വിഷമിച്ചിട്ടോ ആശങ്കപ്പെട്ടിട്ടോ കാര്യമില്ല. അത് കഴിഞ്ഞുപോയതാണ്, ഇനി മാറ്റാനാവില്ല. നമ്മുടെ നിയന്ത്രണത്തിലുമല്ല. അപ്പോൾപ്പിന്നെ അതിനെ മനസിലിട്ട് മനസിനെ കൂടുതല്‍ വേദനിപ്പിക്കുന്നതെന്തിന്?

നമ്മുടെ ചിന്തകളെ പോസിറ്റീവ് ആക്കാം!

ഇത്തരം നെഗറ്റീവ് ചിന്തകൾ മനസില്‍ വളരാനനുവദിച്ചാല്‍ നിങ്ങള്‍ പോലും അറിയാതെ നിങ്ങൾക്കുള്ളില്‍ നെഗറ്റീവ് വൈബ്രേഷൻസ് ഉണ്ടാകും. നെഗറ്റീവ് വികാരങ്ങളായ ദേഷ്യം, നിരാശ എന്നിവ മനസില്‍ കുമിഞ്ഞുകൂടും. അത് പലവിധ ശാരീരിക, മാനസിക, വൈകാരിക പ്രശ്നങ്ങൾക്ക് കാരണമാകും. സ്വയം സൃഷ്ടിച്ച ഒരു നരകമായി ജീവിതം മാറും.

ഇതിനെ എങ്ങനെ മറികടക്കാം? ക്ഷമ എന്നത് തന്നെയാണ് മന്ത്രം. മറ്റാരെങ്കിലും മൂലമുണ്ടായ മാനസിക വിഷമമാണെങ്കില്‍ അവരോട് ക്ഷമിക്കുക. പറയുന്നത്ര എളുപ്പമല്ല. അവരോട് അക്കാര്യം പറയണമെന്നുമല്ല. ഈ ഒരു കാര്യം മനസിനെ വേദനിപ്പിക്കാന്‍ ഇനി അനുവദിക്കില്ല എന്നു തീരുമാനിക്കു. മറ്റൊരാളുടെ അപക്വതയെ പക്വതാപൂര്‍വം അവഗണിക്കാനുള്ള മാനസിക, വൈകാരിക വളര്‍ച്ച നിങ്ങൾക്കുണ്ടല്ലോ എന്ന് അഭിമാനിക്കുക.

നല്ല പുസ്തകങ്ങൾ വായിക്കുക, കലകൾ ആസ്വദിക്കുക, പോസിറ്റീവ് ആൾക്കാരുമായി സമയം ചിലവഴിക്കുക, പ്രകൃതിയോട് കൂടുതല്‍ ഇണങ്ങുക, പുതിയൊരു വ്യായാമം തുടങ്ങുക, ജീവിതശൈലിയില്‍ മാറ്റം വരുത്തുക ഇതെല്ലാം തീര്‍ച്ചയായും നിങ്ങളെ സഹായിക്കും. മാറ്റം നിങ്ങൾക്ക് തന്നെ ദൃശ്യമാകും.

സ്വയം ഉരുത്തിരിഞ്ഞ് വരാൻ അനുവദിക്കുക. പ്യൂപ്പയില്‍ നിന്ന് വരുന്ന പൂമ്പാറ്റയെപ്പോലെ പ്രതിസന്ധികൾ കടന്ന് ജീവിതത്തിലേക്ക് നിറമുള്ള ചിറകുകൾ വിരിച്ച് പറക്കൂ..