ഒരു ദിവസം എത്രമാത്രം ഗ്രീൻ ടീ കുടിക്കാം?

രാവിലെയും വൈകുന്നേരവും നമ്മൾ കുടിക്കുന്ന കാപ്പിക്കും ചായയ്ക്കും പകരമായി കുടിക്കാവുന്ന ഒരു ആരോഗ്യകരമായ പാനീയമാണ് ഗ്രീൻ ടീ. ആന്റിഓക്‌സിഡന്റുകളും പോഷകങ്ങളും നിറഞ്ഞ ഗ്രീൻ ടീ കൊണ്ട് മനുഷ്യശരീരത്തിന് ധാരാളം ഗുണങ്ങളുണ്ട്. വാസ്തവത്തിൽ, ആരോഗ്യം മാത്രമല്ല, ഇത് ചർമ്മത്തെയും മുടിയെയും മെച്ചപ്പെടുത്തും. അങ്ങനെ നിരവധി ഗുണങ്ങൾ നൽകുന്നതിനാൽ മിക്ക ആളുകൾക്കും പ്രിയങ്കരമായ പാനീയമാണ് ഗ്രീൻ ടീ.

എന്നിരുന്നാലും, ദീർഘകാലത്തേക്ക് ഉയർന്ന ഡോസ് ഉപഭോഗം ചില പ്രതികൂല ഫലങ്ങൾ ഉണ്ടാക്കിയേക്കാം. ഗ്രീൻ ടീ ഒരു ജനപ്രിയമായ ചായ ആണെങ്കിലും, സ്വന്തമായി ഉണ്ടാക്കുമ്പോൾ ശ്രദ്ധിക്കേണ്ട ചില കാര്യങ്ങളുണ്ട്. പ്രത്യേകിച്ചും, ദിവസവും കുടിക്കുന്ന ഗ്രീൻ ടീയുടെ അളവിനെക്കുറിച്ച് ശ്രദ്ധിക്കേണ്ടതുണ്ട്.

ചർമ്മ സൗന്ദര്യം മെച്ചപ്പെടുത്താനും ശരീരഭാരം കുറയ്ക്കാനും ഗ്രീൻ ടീ സഹായിക്കുന്നതിനായി പല ആളുകളും ഇത് കണക്കില്ലാതെ കുടിക്കുന്ന ഒരു രീതി കണ്ടുവരുന്നുണ്ട്. ദിവസവും രണ്ട് മുതൽ മൂന്ന് കപ്പ് വരെ ഗ്രീൻ ടീ കുടിക്കുന്നതാണ് ഉചിതം. അമിതമായാൽ ഇതിന് ധാരാളം പോരായ്മകളുണ്ട്. അതിനാൽ പരിധി വിട്ട് കുടിക്കുന്നത് ഒട്ടും നല്ല ആശയമല്ല.

ഗ്രീൻ ടീയുടെ ഗുണങ്ങൾ പര്യവേക്ഷണം ചെയ്യുന്ന പഠനങ്ങൾ എല്ലാ ദിവസവും കഴിക്കേണ്ട ഗ്രീൻ ടീയുടെ ശരിയായ അളവിൽ വ്യത്യസ്ത തെളിവുകൾ കാണിക്കുന്നു. എന്നാൽ ആ പഠനങ്ങളെല്ലാം കാണിക്കുന്നത് ഗ്രീൻ ടീ അമിതമായി കുടിക്കുന്നത് ഗുണത്തേക്കാളേറെ ദോഷം ചെയ്യുമെന്നാണ്. ശരാശരി, മിക്ക ആളുകൾക്കും ഒരു ദിവസം രണ്ട് മുതൽ മൂന്ന് കപ്പ് ഗ്രീൻ ടീ മതിയാകും.

ഗ്രീൻ ടീ കുടിക്കുന്നത് മിതമായ അളവിൽ ആയിരിക്കണമെന്ന് പറയുന്നതിന് നിരവധി കാരണങ്ങളുണ്ട്. അല്ലെങ്കിൽ, ചില പാർശ്വഫലങ്ങൾ നേരിടേണ്ടി വന്നേക്കാം. ഗ്രീൻ ടീയുടെ അമിത ഉപഭോഗത്തിന്റെ ദോഷകരമായ ഫലങ്ങൾ പ്രധാനമായും അതിന്റെ കഫീൻ ഉള്ളടക്കം, അലൂമിനിയത്തിന്റെ സാന്നിധ്യം, ഇരുമ്പിന്റെ ജൈവ ലഭ്യതയിൽ ടീ പോളിഫെനോളുകളുടെ സ്വാധീനം എന്നിവ മൂലമാണ്. ഗ്രീൻ ടീയുടെ പാർശ്വഫലങ്ങൾ എന്തൊക്കെയാണെന്ന് നോക്കാം.

1.അനീമിയ-ഇത് ഒരു വ്യക്തിയുടെ ഭക്ഷണത്തിൽ നിന്ന് ഇരുമ്പിന്റെ ലഭ്യത ഗണ്യമായി കുറയാൻ കാരണമാകും.

2.കഫീൻ സംവേദനക്ഷമത-കഫീൻ സംവേദനക്ഷമതയുള്ള ആളുകൾക്ക്, ഉയർന്ന അളവിൽ ഗ്രീൻ ടീ വയറുവേദന, അസ്വസ്ഥത, ഓക്കാനം, വയറിളക്കം എന്നിവയിലേക്ക് നയിച്ചേക്കാം.

3.ഹൃദയ സംബന്ധമായ അവസ്ഥകൾ-ഉയർന്ന അളവിലുള്ള കഫീൻ ഉപഭോഗം ഹൃദയ താളം വർദ്ധിപ്പിക്കുന്നതിന് കാരണമാകും.

4.കരൾ പ്രശ്നം-നിശ്ചിത കാലയളവിൽ ഗ്രീൻ ടീയുടെ അമിത ഉപയോഗം കരൾ കോശങ്ങളിൽ വീക്കം ചെലുത്തുകയും കരളിനെ തകരാറിലാക്കുകയും ചെയ്യും. ജനന വൈകല്യങ്ങൾ ഉണ്ടാകാനുള്ള സാധ്യത കൂടുതലായതിനാൽ ഗർഭിണികളും മുലയൂട്ടുന്ന അമ്മമാരും ഗ്രീൻ ടീയുടെ അമിത ഉപഭോഗത്തിൽ ജാഗ്രത പാലിക്കണം.

മാത്രമല്ല, ഉത്കണ്ഠയ്ക്കും ഉറക്കമില്ലായ്മയ്ക്കും സാധ്യതയുള്ള ആളുകൾ ഗ്രീൻ ടീ ഉയർന്ന അളവിൽ കുടിക്കരുത്. ഓർക്കുക, എന്ത് ഭക്ഷണം തന്നെയായാലും മിതത്വമാണ് പ്രധാനം.