തൈറോയ്ഡ് കാന്‍സറിന്റെ അഞ്ച് ലക്ഷണങ്ങള്‍

ആഗോളതലത്തില്‍ മാത്രമല്ല, ഇന്ത്യയിലും തൈറോയ്ഡ് ക്യാന്‍സര്‍ കേസുകള്‍ അതിവേഗം വര്‍ദ്ധിച്ചുകൊണ്ടിരിക്കുകയാണ്. കഴിഞ്ഞ 35 വര്‍ഷത്തിനിടയില്‍, ലോകമെമ്പാടും നടത്തിയ പഠനങ്ങള്‍ കാണിക്കുന്നത് തൈറോയ്ഡ് ക്യാന്‍സര്‍ കേസുകളുടെ എണ്ണം ഇന്ത്യയില്‍ മൂന്നിരട്ടിയായി വര്‍ധിച്ചുവെന്നാണ്. സ്ത്രീകളില്‍ തൈറോയ്ഡ് ക്യാന്‍സറിന്റെ നിരക്ക് പുരുഷന്മാരേക്കാള്‍ നാലിരട്ടി കൂടുതലാണ്. 35നും 60നും ഇടയില്‍ പ്രായമുള്ള സ്ത്രീകളില്‍ സ്തനാര്‍ബുദത്തിന് ശേഷം രണ്ടാമത്തെ ഏറ്റവും വലിയ ക്യാന്‍സറാണ് തൈറോയ്ഡ് ക്യാന്‍സര്‍.

ക്യാന്‍സര്‍ പലതരത്തില്‍ ശരീരത്തെ പിടികൂടുന്നു. അതിലൊന്നാണ് തൈറോയ്ഡ് ക്യാന്‍സര്‍. ആശങ്കാജനകമെന്നു പറയട്ടെ, പുരുഷന്മാരേക്കാള്‍ സ്ത്രീകള്‍ക്കാണ് തൈറോയ്ഡ് ക്യാന്‍സറിന്റെ അപകടസാധ്യത കൂടുതല്‍. തൈറോയ്ഡ് ഗ്രന്ഥിയില്‍ തുടങ്ങുന്ന ഈ ക്യാന്‍സര്‍ സാവധാനത്തില്‍ വളരുന്നു. തൈറോയ്ഡ് ഗ്രന്ഥിയില്‍ ആരംഭിക്കുന്ന ക്രമരഹിതമായ കോശവളര്‍ച്ചയെ തൈറോയ്ഡ് ക്യാന്‍സര്‍ എന്ന് വിളിക്കുന്നു. തൊണ്ടയുടെ അടിഭാഗത്ത്, ശ്വാസനാളത്തോട് ചേര്‍ന്ന്, തൈറോയ്ഡ് എന്ന ഗ്രന്ഥിയുണ്ട്. ഇതിന് വലത്, ഇടത് ഭാഗങ്ങളുണ്ട്. ചിത്രശലഭത്തിന്റെ ആകൃതിയാണ് ഇതിനുള്ളത്. ശരീരഭാരം, രക്തസമ്മര്‍ദ്ദം, ഹൃദയമിടിപ്പ്, രക്തയോട്ടം, ശരീര താപനില, മറ്റ് ഘടകങ്ങള്‍ എന്നിവ നിയന്ത്രിക്കുന്ന ഹോര്‍മോണുകള്‍ തൈറോയ്ഡ് ഉത്പാദിപ്പിക്കുന്നു.

ഈ അര്‍ബുദത്തിന് ആദ്യകാല ലക്ഷണങ്ങള്‍ വിരളമാണ്. എന്നിരുന്നാലും, ക്ഷീണം, ചര്‍മ്മം, മുടി, നഖം എന്നിവയിലെ മാറ്റങ്ങള്‍ തൈറോയ്ഡ് ക്യാന്‍സറിന്റെ ലക്ഷണങ്ങളായിരിക്കാം. തൈറോയ്ഡ് ക്യാന്‍സറിന്റെ ലക്ഷണങ്ങളെക്കുറിച്ച് പറയുമ്പോള്‍, ഇത് സാധാരണയായി കഴുത്തിന്റെ അടിഭാഗത്ത് ഒരു പിണ്ഡം, വീര്‍ത്ത ലിംഫ് നോഡുകള്‍, ശബ്ദ മാറ്റങ്ങള്‍, വിഴുങ്ങാന്‍ ബുദ്ധിമുട്ട് എന്നിവ ഉണ്ടാക്കുന്നു.

തൈറോയ്ഡ് ക്യാന്‍സര്‍, അനാപ്ലാസ്റ്റിക് തൈറോയ്ഡ് ക്യാന്‍സര്‍, മെഡുല്ലറി തൈറോയ്ഡ് ക്യാന്‍സര്‍ എന്നിങ്ങനെ മൂന്ന് തരം തൈറോയ്ഡ് ക്യാന്‍സര്‍ ഉണ്ട്. തൈറോയ്ഡ് ക്യാന്‍സറിന്റെ ചില തരങ്ങള്‍ വളരെ അപകടകരമാണ്. മിക്കവയും ശരീരത്തില്‍ സാവധാനത്തില്‍ വികസിക്കുന്നവയാണ്. പുരുഷന്മാരേക്കാള്‍ സ്ത്രീകള്‍ക്ക് തൈറോയ്ഡ് പ്രശ്‌നങ്ങള്‍ ഉണ്ടാകാനുള്ള സാധ്യത കൂടുതലാണെന്ന് പഠനങ്ങള്‍ പറയുന്നു. ഇത് സ്ത്രീകളിലും പുരുഷന്മാരിലുമുള്ള ഹോര്‍മോണുകളുടെ വ്യത്യാസം മൂലമാണ്. വിദഗ്ധരുടെ അഭിപ്രായത്തില്‍ ഈസ്ട്രജന്‍ ഇതില്‍ ഒരു പങ്ക് വഹിക്കുന്നുണ്ട്. സ്ത്രീകളുടെ ശരീരത്തില്‍ ഈസ്ട്രജന്റെ അളവ് കൂടുതലാണ്.

തൈറോയ്ഡ് ക്യാന്‍സറിന്റെ ലക്ഷണങ്ങള്‍ എന്തൊക്കെയാണെന്ന് നോക്കാം.

1.ശബ്ദത്തില്‍ മാറ്റം-തൈറോയ്ഡ് ക്യാന്‍സര്‍ വരുമ്പോള്‍ ശബ്ദത്തില്‍ മാറ്റമുണ്ടാകുന്നു. ശബ്ദം അല്‍പം കനത്തതായിരിക്കും. ക്യാന്‍സര്‍ കാരണം തൈറോയ്ഡ് ഹോര്‍മോണിലെ മാറ്റങ്ങള്‍ വോക്കല്‍ കോഡുകളെ ബാധിക്കുന്നു. ഈ അവസ്ഥയില്‍ ശബ്ദം മന്ദഗതിയിലോ ഉച്ചത്തിലോ ആകാം. ശബ്ദത്തില്‍ പരുഷത അനുഭവപ്പെടാം.

2.ഭക്ഷണം കഴിക്കാന്‍ ബുദ്ധിമുട്ട്-തൈറോയ്ഡ് ക്യാന്‍സര്‍ രോഗിക്ക് എന്തെങ്കിലും കഴിക്കാന്‍ ബുദ്ധിമുട്ടായിരിക്കും. ചില രോഗികള്‍ക്ക് ശ്വസിക്കുന്നതിലും ബുദ്ധിമുട്ടുകള്‍ ഉണ്ടാകാറുണ്ട്. കഴുത്തിലെ മുഴ വലുതാകുന്നതോടെ മൃദുവായ സാധനങ്ങള്‍ കഴിക്കാന്‍ വരെ ബുദ്ധിമുട്ട് അനുഭവപ്പെട്ടേക്കാം.

3.കഴുത്തിലും തൊണ്ടയിലും വേദന-തൈറോയ്ഡ് ക്യാന്‍സര്‍ ഉള്ളവര്‍ക്ക് കഴുത്തില്‍ കഠിനമായ വേദനയുണ്ടാകും. ചിലപ്പോള്‍ കഴുത്തിലെയും തൊണ്ടയിലെയും വേദന ചെവിയിലും എത്തുന്നു. തൈറോയ്ഡ് ക്യാന്‍സര്‍ ബാധിച്ച രോഗികളില്‍ കഴുത്ത് സാധാരണയേക്കാള്‍ കട്ടിയുള്ളതായി കാണപ്പെടുന്നു. ആന്തരിക വീക്കം മൂലമാണ് ഇത് സംഭവിക്കുന്നത്.

4.വിട്ടുമാറാത്ത ചുമ-ചുമ പോലുള്ള ഒരു സാധാരണ പ്രശ്‌നത്തെ നമ്മള്‍ നിസ്സാരമായി കാണുന്നു. എന്നാല്‍ വിട്ടുമാറാത്ത ചുമയെ നിസ്സാരമായി കാണരുത്. ചുമ തൈറോയ്ഡ് ക്യാന്‍സറിന്റെ ഒരു ലക്ഷണമാകാം. തൈറോയ്ഡ് ക്യാന്‍സര്‍ കാരണം ശരീരഭാരം കൂടുക, വിശപ്പില്ലായ്മ, അമിത തണുപ്പ് തുടങ്ങിയവയും ചിലപ്പോൾ ഉണ്ടാകാം.

5.കഴുത്തില്‍ മുഴ-തൈറോയ്ഡ് ക്യാന്‍സര്‍ ഉണ്ടെങ്കില്‍ കഴുത്തില്‍ മുഴ അനുഭവപ്പെടാം. കഴുത്തിലെ ലിംഫ് നോഡുകള്‍ വീര്‍ക്കുന്നതും തൈറോയ്ഡ് ക്യാന്‍സറിന്റെ ലക്ഷണമാണ്. തൈറോയ്ഡ് ക്യാന്‍സര്‍ വരുമ്പോള്‍ ഉണ്ടാകുന്ന മുഴ കഠിനമാണ്. അതിന്റെ വലിപ്പവും വലുതായിരിക്കും. മുഴകള്‍ ഒന്നോ അതിലധികമോ ആകാം.

തൈറോയ്ഡ് പ്രവര്‍ത്തനം മെച്ചപ്പെടുത്താന്‍ എന്തൊക്കെ ചെയ്യാമെന്ന് നോക്കാം.

1.മെറ്റബോളിസം മെച്ചപ്പെടുത്താന്‍ ഓട്സ്, ബ്രൗണ്‍ റൈസ്, ക്വിനോവ എന്നിവ ഭക്ഷണത്തില്‍ ഉള്‍പ്പെടുത്തുക.

2.ഒമേഗ 3 ഫാറ്റി ആസിഡ് അടങ്ങിയ നിരവധി ഭക്ഷണ പദാര്‍ത്ഥങ്ങളുണ്ട്. ഈ ഭക്ഷണങ്ങള്‍, (മുട്ട, കടൽ മത്സ്യങ്ങൾ, ഇലക്കറികൾ) ഭക്ഷണത്തില്‍ ഉള്‍പ്പെടുത്തുക.

3.ഉറക്കചക്രം ക്രമപ്പെടുത്തുകയും സമ്മര്‍ദ്ദം നിയന്ത്രിക്കുകയും ചെയ്യുക. ദിവസവും കുറഞ്ഞത് 7-8 മണിക്കൂറെങ്കിലും ഉറങ്ങേണ്ടത് വളരെ പ്രധാനമാണ്. തൈറോയ്ഡ് ഹോര്‍മോണുകള്‍ മെച്ചപ്പെടുത്താന്‍ പരിഗണിക്കേണ്ട മറ്റൊരു ഘടകമാണ് സ്‌ട്രെസ് മാനേജ്‌മെന്റ്.

4.തിന, സോയ ഭക്ഷണങ്ങള്‍, കാപ്പി, മദ്യം എന്നിവ ഒഴിവാക്കുക.

5.വിറ്റാമിന്‍ ഡി ഒരു അവശ്യ ധാതുവാണ്, ശരീരത്തിന് അത് ആവശ്യത്തിന് ലഭിക്കുന്നത് ഉറപ്പാക്കണം. അതിനായി വിറ്റാമിന്‍ ഡി അടങ്ങിയ ഭക്ഷണങ്ങള്‍ കഴിക്കുക.

തൈറോയ്ഡ് ക്യാന്‍സറിന്റെ ലക്ഷണങ്ങള്‍ കണ്ടാല്‍ ഉടന്‍ ഡോക്ടറെ സമീപിക്കുക. ബയോപ്‌സിയുടെയും മറ്റ് പരിശോധനകളുടെയും സഹായത്തോടെ ക്യാന്‍സര്‍ സ്ഥിരീകരിച്ചാല്‍ ഉടന്‍ ചികിത്സ ആരംഭിക്കുക.