വേനലിൽ ചൂടിനോടൊപ്പം തന്നെ സൂക്ഷിക്കേണ്ട അസുഖങ്ങൾ

മഴക്കാലത്ത് മാത്രമല്ല, വേനല്‍ക്കാലത്തും നിരവധി രോഗങ്ങള്‍ പകരാന്‍ സാധ്യത വളരെ കൂടുതലാണ്. വേനല്‍ക്കാലത്ത് നമ്മള്‍ സൂര്യനില്‍ നിന്നും ആരോഗ്യത്തേയും ചര്‍മ്മത്തേയും സംരക്ഷിക്കാന്‍ പല മാര്‍ഗ്ഗങ്ങള്‍ നോക്കാറുണ്ട്. അതുപോലെ, താഴെ പറയുന്ന രോഗങ്ങള്‍ വരാതിരിക്കാനും വേണ്ട ശ്രദ്ധ നല്‍കേണ്ടത് അനിവാര്യമാണ്. അവ ഏതെല്ലാമെന്ന് നോക്കാം.

1.ആസ്മ-ആസ്മ രോഗങ്ങള്‍ വരാന്‍ സാധ്യത കൂടുതലുള്ള ഒരു സമയമാണ് വേനല്‍ക്കാലം. ഈ സമയത്ത് അന്തരീക്ഷത്തില്‍ കൂടുതല്‍ പൊടിപടലങ്ങള്‍ ഉണ്ടാകുന്നു. അന്തരീക്ഷമലിനീകരണം കൂടുന്ന ഒരു സമയമായതിനാല്‍ തന്നെ പലര്‍ക്കും ആസ്മ രോഗങ്ങള്‍ ഉണ്ടാകുന്നതിന് ഇത് ഒരു കാരണമാണ്. പ്രത്യേകിച്ച് ശ്വാസംമുട്ട് പോലെയുള്ള അസുഖങ്ങള്‍ നേരിടുന്നവര്‍ക്ക് ഇത് കൂടുതല്‍ ബുദ്ധിമുട്ട് ഉണ്ടാക്കുന്നുണ്ട്. ഇത് വരാതിരിക്കാന്‍ പുറത്തേക്ക് ഇറങ്ങുമ്പോള്‍ മാസ്‌ക് ധരിക്കുന്നത് നല്ലതാണ്. ഒരു പരിധിവരെ ആസ്മരോഗങ്ങള്‍ തടയാം. അതുപോലെ, നല്ല ആഹാരം കഴിക്കുക. ആവി പിടിക്കുക. കഫക്കെട്ട് വരാതിരിക്കാനുള്ള മുന്‍കരുതലുകള്‍ ഡോക്ടറെ കണ്ട് എടുക്കേണ്ടത് അനിവാര്യമാണ്.

2.ചിക്കന്‍പോക്‌സ്-വേനല്‍ക്കാലത്ത് പൊതുവില്‍ കണ്ട് വരുന്ന ഒരു പകര്‍ച്ചവ്യാധിയാണ് ചിക്കന്‍പോക്‌സ്. ഇത് വന്ന് കഴിഞ്ഞാല്‍ ദേഹത്താകമാനം ചെറിയ കുമിളകള്‍ പോലെ പൊന്തുന്നു. ഇത് വാരിസെല്ല സോസ്റ്റര്‍ വൈറസ് മൂലമാണ് പകരുന്നത്. ഇത് ഒരാളില്‍ നിന്നും മറ്റൊരാളിലേയ്ക്ക് പകരുന്ന രോഗമാണ്. ഇത് വന്ന് കഴിഞ്ഞാല്‍ ദേഹമാസകലം വേദന അനുഭവപ്പെടും. അതുപോലെ, നിര്‍ജലീകരണം ഉണ്ടാകും. ഇതിന്റെ കുരു പൊട്ടുന്നതിനനുസരിച്ച് ശരീരത്തിന്റെ ഓരോ ഭാഗത്തേയ്ക്ക് ഇത് പകരാന്‍ സാധ്യത കൂടുതലാണ്. അതിനാല്‍, ഇത് വന്ന രോഗിയെ ഒരു മുറിയിലാക്കി മറ്റുള്ളവരുമായുള്ള സമ്പര്‍ക്കം കുറയ്ക്കുന്നതാണ് നല്ലത്.

3.ചെങ്കണ്ണ്-വേന്‍ക്കാലത്ത് കണ്ടുവരുന്ന മറ്റൊരു അസുഖമാണ് ചെങ്കണ്ണ്. ഇതും പകരുന്ന ഒരു രോഗമാണ്. കണ്ണിന് ചുവപ്പ് നിറം വരുക, കണ്ണില്‍ പീളകെട്ടുക, കണ്ണ് വേദനിക്കുക,. കണ്ണില്‍ നിന്നും വെള്ളം വരുക തുടങ്ങിയവയെല്ലാം ഈ രോഗത്തിന്റെ ലക്ഷണമാണ്. ഈ അസുഖം വന്നവര്‍ കണ്ണ് തിരുമ്മാതരിക്കുക. കണ്ണില്‍ തൊട്ട് മറ്റൊരാളുടെ സാധനങ്ങളില്‍ തൊടുന്നത് ചിലപ്പോള്‍ അയാളിലേയ്ക്ക് അസുഖം പകരുന്നതിന് കാരണമാവുകയും ചെയ്യുന്നു. ഇത് വന്നാല്‍, ഡോക്ടറെ കണ്ട് കൃത്യമായി മരുന്ന് ഒഴിച്ചാല്‍ മാറ്റി എടുക്കാവുന്നതാണ്.

4.പനി, കഫക്കെട്ട്-ഏത് കാലാവസ്ഥയിലും വരുന്ന അസുഖങ്ങളില്‍ ഒന്നാണ് പനിയും കഫക്കെട്ടും. വേനല്‍ക്കാലത്ത് തലയില്‍ വിയര്‍പ്പിരുന്ന് നീര് ഇറങ്ങിയും കഫക്കെട്ട് വരുന്നതും പനി വരുന്നതും പതിവാണ്. ഇത് വരാതിരിക്കാന്‍ രോഗപ്രതിരോധശേഷി വര്‍ദ്ധിപ്പിക്കുക എന്നതാണ് പ്രധാനപ്പെട്ട കാര്യം. അതുപോലെ, തല നനച്ചതിന് ശേഷം ഉടനെ വെയിലത്ത് ഇറങ്ങുനന്നത് നിര്‍കെട്ട് വരുന്നതിന് കാരണമാകുന്നു. അതിനാല്‍ ഇത്തരം പ്രശ്‌നങ്ങള്‍ വരാതെ ശ്രദ്ധിക്കുക.

5.ചര്‍മ്മരോഗങ്ങള്‍-ചൂടുകാലത്താണ് ഏറ്റവുമധികം ചര്‍മ്മരോഗങ്ങള്‍ ഉണ്ടാകുന്നത്. വരണ്ട ചര്‍മ്മം മുതല്‍, ചൂടുകുരു, കാല്‍പാദങ്ങള്‍ വരണ്ട് പൊന്തുന്നത്, തലയിലെ താരന്‍ എന്നിവയെല്ലാം തന്നെ വേനല്‍ക്കാലത്തെ ചര്‍മ്മരോഗങ്ങളില്‍ ഒന്നാണ്. ഇവ ഒഴിവാക്കുന്നതിനായി ചര്‍മ്മം എല്ലായ്‌പ്പോഴും മോയിസ്ചറൈസർ ചെയ്ത് നിലനിര്‍ത്തണം. അതുപോലെ, നന്നായി വെള്ളം കുടിക്കുക.

മുകളിൽ പറഞ്ഞ അസുഖങ്ങളെല്ലാം തന്നെ ചൂട് പോലെ തന്നെ വേനൽക്കാലങ്ങളിൽ കണ്ടു വരുന്ന അസുഖങ്ങളാണ്. കൃത്യസമയത്ത് തന്നെ ഡോക്ടറെ കണ്ട് ചികിത്സ തേടിയാൽ മാറുന്നവയാണ് ഈ അസുഖങ്ങളെല്ലാം തന്നെ.