പാക്കറ്റ് പാല് തിളപ്പിച്ച് കുടിക്കേണ്ട ആവശ്യമുണ്ടോ?
- Alfa MediCare
- Nov 11, 2023
- 2 min read
പാല് കുടിച്ചാല് നിരവധി ഗുണങ്ങളാണ് ഉള്ളത്. അതിനാല് തന്നെ പലരും പാല് വേണ്ടുവോളം കുടിക്കുന്നതും കാണാം. ഇന്ന് പണ്ടത്തെപോലെ വീടുകളില് നിന്നും പാല് വാങ്ങി ഉപയോഗിക്കുന്നത് വളരെ കുറവാണ്. പലരും പാക്കറ്റ് പാലാണ് വാങ്ങി ഉപയോഗിക്കുന്നത്. ഇത്തരത്തില് പാക്കറ്റ് പാല് വാങ്ങിച്ചാലും നമ്മള് നല്ലപോലെ ചൂടാക്കി കുടിക്കുന്നത് കാണാം. എന്നാല്, പാക്കറ്റ് പാല് ചൂടാക്കി കുടിക്കേണ്ട ആവശ്യമുണ്ടോ?
പണ്ട് കാലത്ത് മിക്ക വീടുകളിലും പശു ഉണ്ടായിരുന്നു. പശു ഇല്ലാത്ത വീടുകളാണെങ്കില് നമ്മള് അടുത്തുള്ള വീടുകളില് നിന്നും പാല് വാങ്ങിക്കുകയാണ് പതിവ്. ഇത്തരത്തില് കറന്നെടുത്ത പാല് നേരിട്ട് കിട്ടുമ്പോള് നമ്മള് അതില് നിന്നും അണുക്കള് ഇല്ലാതാക്കാന് നല്ലപോലെ തിളപ്പിച്ചെടുക്കും. തിളപ്പിക്കാത്ത പാല് കുടിച്ചാല് അത് പലവിധത്തിലുള്ള ആരോഗ്യ പ്രശ്നങ്ങളിലേയ്ക്ക് നമ്മളെ നയിക്കാം. പ്രത്യേകിച്ച് തിളപ്പിക്കാത്ത പാലില് സാല്മോണെല്ല എന്ന ബാക്ടീരിയ അടങ്ങിയിരിക്കുന്നു. ഇത് വയറിളക്കം, വയറുവേദന, പനി, ഛര്ദ്ദി എന്നീ ആരോഗ്യ പ്രശ്നങ്ങള് ഉണ്ടാക്കുന്നതിന് കാരണമാകുന്നുണ്ട്. അതുപോലെ ഈ കോലി ബാക്ടീരിയ ഇതില് അടങ്ങിയിരിക്കാന് കാരണമാകുന്നുണ്ട്. ഇത് ശരീരത്തില് അമിതമായാല് വൃക്ക തകരാറിലാകാന് വരെ കാരണമാകുന്നുണ്ട്. ഇത്തരത്തില് പലതരത്തിലുള്ള ബാക്ടീരിയകള് നമ്മളുടെ പാലില് അടങ്ങിയിരിക്കുന്നു. അതിനാലാണ് പാല് തിളപ്പിച്ച് കുടിക്കണം എന്ന് പറയുന്നത്.
എന്നാല്, നമ്മള് വീടുകളില് കറന്നെടുക്കുന്ന പാലിനെ അപേക്ഷിച്ച് പാക്കറ്റ് പാലാണ് ഉപയോഗിക്കുന്നതെങ്കില് ചൂടാക്കേണ്ട ആവശ്യമേ ഇല്ല. കാരണം, ഇത്തരം പാലുകള് ഒരു നിശ്ചിത താപനിലയില് ചൂടാക്കി അണുവിമുക്തമാക്കിയതിന് ശേഷമാണ് നമ്മളിലേയ്ക്ക് എത്തുന്നത്. ഇതിനെ പാസ്ച്വുറൈസേഷന് എന്ന് പറയുന്നു. ഇന്ന് മാര്ക്കറ്റില് ലഭിക്കുന്ന ഒട്ടുമിക്ക പാലുകളും പാസ്ച്വറൈസേഷന് കഴിഞ്ഞാണ് പാക്കറ്റുകളിലാക്കി നമ്മൡലേയ്ക്ക് എത്തുന്നത്. അതിനാല്, ഇവ വീണ്ടും വീണ്ടും ചൂടാക്കി ഉപയോഗിക്കേണ്ട ആവശ്യമേ ഇല്ല. എന്നാല്, പലരും പാക്കറ്റ് പാല് ചൂടാക്കും. ചിലര്ക്ക് പാക്കറ്റ് പാല് ചൂടാക്കിയതിന് ശേഷമുള്ള രുചിയായിരിക്കും താല്പര്യം. ചിലരാണെങ്കില് പണ്ട് കാലം മുതല് പാല് ചൂടാക്കി കുടിച്ച് അത് ഒരു ശീമായി മാറിയിട്ടുണ്ടാകും. അതുപോലെ, പാക്കറ്റ് പാല് അത്ര സേയ്ഫ് അല്ല. പാല് വീണ്ടും ചൂടാക്കുന്നത് നല്ലതാണ് എന്ന് വിശ്വസിക്കുന്നവരും കുറവല്ല. അതിനാലാണ് പലരും പാക്കറ്റ് പാല് വീണ്ടും ചൂടാക്കി ഉപയോഗിക്കുന്നത്.
പാല് അമിതമായി ചൂടാക്കിയാല് അതിന്റേതായ പ്രശ്നങ്ങളും ഉണ്ട്. ശുദ്ധമായ പാലിന്റെ രുചി ഇത്തരത്തില് അമിതമായി ചൂടാക്കുന്നതിലൂടെ നഷ്ടമാകുന്നുണ്ട്. അതുപോലെ പാലിന് ഒരു പുകഞ്ഞ മണം ലഭിക്കാനും ഇത് കാരണമാകുന്നു. മൊത്തത്തില് പാലിന്റെ രുചിയും മണവും അമിതമായി ചൂടാക്കുന്നതിലൂടെ നഷ്ടമാകുന്നു. അതുപോലെ തന്നെ, പാല്പ്പാട കെട്ടാല് വളരെ സാധ്യത കൂടുതലാണ്. പാല് അമിതമായി ചൂടാക്കുമ്പോഴാണ് പാട കെട്ടുന്നത്. അതുപോലെ, പാലിലെ പോഷകങ്ങള് നഷ്ടമാകുന്നതിന് ഇത് ഒരു കാരണമാണ്. പ്രത്യേകിച്ച് പാലില് അടങ്ങിയിരിക്കുന്ന വിറ്റമിന് സി, വിറ്റമിന് ബി എന്നിവ ചൂടാക്കുമ്പോള് ഇല്ലാതാകുന്നു. കൂടാതെ, പാലിന്റെ മൊത്തത്തിലുള്ള ഘടന തന്നെ ഇതിലൂടെ നഷ്ടമാകുന്നു.
പാല് കുടിക്കുന്നത് നല്ലതാണെന്ന് കരുതി നല്ലപോലെ അമിതമായി കുടിക്കുന്നത് നല്ലതല്ല. അമിതമായി പാല് കുടിച്ചാല് ദഹന പ്രശ്നങ്ങള് വരാന് സാധ്യത കൂടുതലാണ്. പ്രത്യേകിച്ച് നിങ്ങള്ക്ക് ലാക്ടോസ് ഇന്ടോളറന്സ് ഉണ്ടെങ്കില് പാല് അമിതമായി കുടിക്കുന്നത് നല്ലതല്ല. ഇത് വയറിളക്കം, അസിഡിറ്റി പ്രശ്നങ്ങള് എന്നിവ ഉണ്ടാക്കുന്നതിന് കാരണമാണ്. അതുപോലെ, പാല് കുറച്ച് ഉപയോഗിച്ച് ഫ്രിഡ്ജില് സൂക്ഷിക്കുന്നവരാണ് നിങ്ങള് എങ്കില് അത് കൃത്യമായ താപനിലയില് തന്നെ സൂക്ഷിക്കാനും ശ്രദ്ധിക്കേണ്ടത് അനിവാര്യമാണ്. അതുപോലെ പാലിന്റെ ഗുണങ്ങള് നല്ലരീതിയില് കിട്ടണമെങ്കില് ഒരിക്കലും പാല് അമിതമായി ചൂടാക്കാതെ ഉപയോഗിക്കാവുന്നതാണ്. അതുപോലെ, പാലിന്റെ കൂടെ കഴിക്കാന് പാടില്ലാത്ത ചില ആഹാരങ്ങള് ഉണ്ട്. അവ പരമാവധി കഴിക്കാതിരിക്കാന് ശ്രദ്ധിക്കുക. രാത്രിയില് പാല് അര ഗ്ലാസ്സ് ചെറുചൂടോടെ കുടിക്കുന്നത് നല്ലതാണ്. ഇത് വേഗത്തില് ഉറക്കം ലഭിക്കാന് സഹായിക്കുന്നതാണ്.
Comments